Shohin kryetaren e Bashkisë, bëjnë edhe drejtorët shpenzime luksi. Sidomos tani në mes të verës arrijnë kulmin tenderat që Eriselda Sefa realizon përmes drejtorive të varësisë.
Së fundmi, në Bashkinë Lushnje është firmosur tenderi me objekt “Blerje pajisje dhe mobilje për zyrat e NPP”. Dokumentet e tenderit janë firmosur nga drejtori i Ndërmarrjes së Pasurive Publike Lushnje, Evis Qyra, por dihet tashmë se paratë nuk lëvizin lehtë pa miratimin e kryetares.
Sipas dokumenteve, drejtori ka vendosur të marrë nga arka e bashkisë 12 milionë lekë për të blerë kompjuter, kolltukë dhe kondicionerë. Epo, po nuk rregulloi veten, si do t’i shërbejë popullit?! Nga ana tjetër, paratë xhirohen tek biznesmeni i paracaktuar për ta fituar tenderin. Në tabelën më poshtë është lista e mallrave që po blen drejtori i Sefës.
Shihet qartë që janë shpenzime luksi, se me sa duket Qyra është mërzitur me kompjuterët e vjetër, po ashtu dëshiron kolltukë më të rehatshëm. Ndërsa kondicionerët i do të llojit të fundit me më shumë opsione.
Prandaj e shpalli garën me 18 qershor 2024 dhe më 1 korrik e mbylli procedurën. E kuptojmë se keni këtë post dhe e përdorni që të përfitoni, po pse firmosni kontrata duke shkelur ligjin mbi prokurimet?
Nga dokumentet e bëra publike në Agjencinë e Prokurimeve Publike, vërejmë se vetëm firma “T&J CONSTRUCTION” sh.p.k ka dorëzuar një ofertë me 10 milionë lekë. Në këtë vlerë ishte një ofertë për t’u marrë në konsideratë, por në këtë rast nuk ka kuptim pasi nuk k asnjë konkurrent tjetër në garë. Edhe për të tilla raste ligji kërkon që procedura të anulohet dhe të bëhet rishikim tenderi.
Por Qyra, me aprovim të Sefës, ka firmosur kontratën me “T&J CONSTRUCTION” sh.p.k, e cila u shpall fituese me një të rënë të lapsit.
Në këto kushte, Open Data Albania vlerëson se kemi të bëjmë me abuzim të ligjit dhe i ka vënë tenderit një “Flamur të kuq” për riskun e korrupsionit.
Kompania përfituese me pronar Julian Manehasën me siguri është e rekomanduar nga kryetarja e bashkisë, sepse drejtori nuk do të merrte guximin t’i jepte tenderin. Kompania nuk ka depozituar asnjë bilanc financiar në QKB.
Dokumenti i mëposhtëm është tërhequr ditën e sotme dhe tregon se kompania nuk depozituar asnjë pasqyrë financiare.
Ndërsa në kriteret, sipas dokumentit të mëposhtëm, kërkohen pasqyrat financiare të 3 viteve të njëpasnjëshme të operatorit pjesëmarrës në prokurim.
Me pak fjalë, kjo kompani nuk përmbush kushtet e firmosura nga vetë drejtori i Sefës. Megjithatë mendojmë se ka qenë një urdhër i kryetares. Këtë ide e krijojmë nga aktiviteti i kompanisë, i cili lidhet ngushtë me vendimet e kryebashkiakes për t’i dhënë fonde “të vogla” që ka pasur në dorë.
Kështu, më 25 prill 2024, kompania e Manehasës ka marrë nga Sefa 20 milionë lekë për furnizimin e bashkisë me drurë dekorativë.
Kujtojmë se Sefa zëvendësoi në postin e kryetares së Bashkisë, Fatos Tushen, i cili bashkë me 10 zyrtarë të tjerë të këtij institucioni dhe biznesmenë u arrestuan me vendim të Gjykatës së Posaçme të Shkallës së Parë pas kërkesës së bërë nga SPAK në vitin 2021. Ai dënua për korrupsion, megjithatë Sefa vazhdon në të njëjtën udhë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post