Pjesë e grupit të trafikimit të 110 kg kokainë, arrestohet 39-vjeçari në Shëngjin

Forcat Operacionale të Policisë së Shtetit kanë arrestuar një 39-vjeçar të shpallur në kërkim ndërkombëtar nga autoritetet e drejtësisë italiane.

Në kuadër të operacionit policor të koduar “Operacionalja 13” është vënë në pranga shtetasi S. B., 39 vjeç, i cili është kapur në Shëngjin, ku qëndronte me dokumente ukrainase false.

Ai kërkohej nga Italia, si bashkëpunëtor për trafikimin e 110 kilogramëve kokainë, kapet dhe vihet në pranga 39-vjeçari.

“Autoritetet gjyqësore në Itali i kanë caktuar 39-vjeçarit, masën e sigurisë “Arrest në burg”, për veprën penale “Trafikimi i lëndëve narkotike”, pasi dyshohet së në bashkëpunim me të tjerë, ka trafikuar nga Belgjika, në Itali, 110 kg lëndë narkotike kokainë. Në momentin e arrestimit, në Shëngjin, shtetasi S. B. kishte me vete dokumente ukrainase, të dyshuara të falsifikuara, të cilat ia sekuestroi Policia.” – thuhet në njoftimin e Policisë.

Autoritetet njoftojnë se vijon bashkëpunimi me homologët, për ta ekstraduar këtë shtetas, në Itali.