Në qershorin e vitit 2021, bashkia e Elbasanit krijoi klubin e ri të futbollit Akademia e Futbollit Elbasani, pasi KF Elbasani, pas shumë vitesh në ligat e ulëta dhe problemeve me pronësinë nuk po arrinte t’i kënaqte mijëra tifozë verdheblu të këtij qyteti dashamirës të sportit më popullorë në botë.
Shumë ishin skeptikë në atë kohë, pasi skuadra e re do ta niste aventurën nga Kategoria e Tretë, niveli i katërt i futbollit në Shqipëri. Megjithatë, tashmë që kanë kaluar 3 vite nga krijimi, AF Elbasani ka 2 tituj kampion dhe një nënkampion.
Në sezonin e parë, 2021-2022, verdheblutë afruan në ekip lojtarë të rinj, por edhe Orges Gavën, i cili ishte një ekspert në futbollin shqiptar ku është aktivizuar me disa ekipe në elitë. Ata arritën të shpallen kampion dhe fituan të drejtën për të luajtur në Kategorinë e Dytë. Në sezonin 2022-2023, ata u shpallën kampion në grupin e jugut, ndërsa humbën në finale ndaj Vorës. Megjithatë, fituan biletën për t’u ngjitur në Kategorinë e Parë.
Nën drejtimin e trajnerit Nevil Dede dhe me një kontingjent lojtarësh që do ta kishin zili edhe klubet e Superiores, AF Elbasani e mbylli sezonin si kampion.
Tashmë, kur jemi vetëm 3 vite nga krijimi i këtij klubi, në të cilin është president Kujtim Llupa, synimet janë të mëdha, teksa pretendohet menjëherë triumfi në elitën e futbollit shqiptar. Për të kuptuar këtë objektiv mjafton të shihet merkato e kryer deri tani, edhe pse fundi i saj është ende larg dhe mund të ketë emra të tjera që mund të afrohen te verdheblutë.
Drejtimin e AF Elbasanit e ka marrë trajneri italian Roberto Bordin. 59-vjeçari ka një karrierë të gjatë si trajner, ku ka drejtuar edhe ekipi me emër, ku në krye qëndron kombëtarja e Moldavisë. Ndërkohë, Bordin ka drejtuar edhe klube si Sheriff Tiraspol në Moldavi e Neftçi Baku në Azerbajxhan. Sezonin e fundit, ai ishte trajner i Triestina-s në ligën e tretë italiane.
Në mbrojtje, verdheblutë afruan menjëherë Bruno Lulajn, i cili sezonin e fundit ishte një nga shtyllat e mbrojtjes së Tiranës dhe prej vitesh është një nga futbollistët më të mirë në Superiore. Po ashtu, një ditë më parë nënshkroi edhe Esin Hakaj, mbrojtësi i krahut i ardhur nga Vllaznia, dhe ai me një karrierë të gjatë në Superiore. Në mesfushë surpriza e madhe është Kristi Qose, ish-mesfushori i kombëtares, i cili në sezonin e fundit ka luajtur në elitën e futbollit sllovak, ndërsa më parë është aktivizuar edhe në çeki e Greqi. Ai do të krijojë dyshen e mesit të fushës me Cristian Dros, 26-vjeçarin nga Moldavia, pjesë e kombëtares së vendit të tij, i cili vjen nga kampionati i Bjellorusisë. Ekipit i janë bashkuar edhe Emiljano Musta, Xhonatan Lajthia, të cilët u janë bashkuar emrave të rëndësishëm të sezonit të kaluar si Bruno Telushi, Greca apo Hasani.
Drejtuesit janë duke punuar pasi synojnë të ndërhyjnë në merkato për të siguruar edhe një portier, si dhe për të sjellë më shumë cilësi në sulm. Aktualisht, pranë firmës është sulmuesi portugez Ze Gomesh dhe portieri italian Xhuzepe Agostini. Ndërkohë, kontakte ka pasur edhe me Spahiun, i cili dy ditë më parë zyrtarizoi largimin nga Egnatia.
AF Elbasani do të debutojë në elitën e futbollit shqiptar më 18 gusht në transfertë ndaj Skënderbeut.
/A2 News/
Discussion about this post