Autor i dopietës së Laçit, Lushkja: Stolin nuk e kemi shumë të mirë

Regi Lushkja ishte autori i dy golave që i dha fitoren skuadrës së Laçit në ndeshjen e javës së 15 të Superligës kundër Kastriotit.

Pas këtij takimi numri 10 i bardhezinjve është ngjitur në kuotën e pesë golave sezonalë, teksa pas ndeshjes u shpreh se u ndihmua shumë nga sulmuesit.

“E nisëm ndeshjen shumë mirë, realizuam një gol të shpejtë, menduam se e kishim ndeshjen nën kontroll, por u tërhoqëm dhe Kastrioti na vuri në vështirësi. Sulmuesit na ndihmojnë shumë në fushë, Guindo-Zarubica-Mazrekaj na nxjerrin përpara dhe na ndihmojnë edhe në mbrojtje. E rëndësishme është që po ecim në rrugën e duhur. Ndeshjet e fundit kanë qenë intensive, lodhja është ndjerë në ndeshjet e fundit. Duhen disa lojtarë me cilësi të mira që do na ndihmojnë shumë, pasi edhe stolin nuk e kemi shumë të mirë. Sigurisht që e kemi merituar këtë pozicion ku jemi, pse jo të tentojmë gjithçka më sipër”-theksoi ai.

Aktualisht Laçi ka kaluar në vend të dytë më pikë të barabarta me Kukësin e vendit të tretë, por ‘Verilindorët’ kanë një ndeshje me pak./K.T/Gijotina.com