Ministria e Mbrojtjes njofton se është bërë i mundur izolimi dhe shuarja e 17 vatrave të zjarrit në vendin tonë në 24 orët e fundit. Megjithatë vijojnë të mbeten problematike disa vatra.
Vijon ende aktive vatra në fshatin Zogaj të bashkisë Tropojë.100 Forca të Armatosura raportohet se u janë bashkuar përpjekjeve të nisura prej dje, të forcave dhe kapaciteteve operacionale të pushtetit vendor të mbështetura nga 3 helikopterët e KFOR bashkë me një ekip nga Kosova. Falë këtyre përpjekjeve është bërë e mundur shmangia e rrezikut për banesat e lagjes Hajdarmataj.
Po ashtu është shmangur kalimi i flakëve drejt banesave në vatrat e zjarrit në fshatin Malecaj dhe fshatin Torovicë, në bashkinë Lezhë, ku gjithashtu janë angazhuar në ndihmë të pushtetit vendor efektivë të Forcave të Armatosura.
Ndërkohë raportohet se po punohet edhe në një tjetër vatër aktive në fshatin Hoten, Vau Dejës; në vendgrumbullimin e mbetjeve të Bashkisë Vlorë, për të cilin janë angazhuar kapacitetet në nivel qarku të mbështetura nga kapacitete të pushtetit qendror si dhe në një vatër zjarri në Bashkinë Konispol, fshati Shalës.
“U bëjmë thirrje për angazhimin maksimal për menaxhimin e situatave të shkaktuara nga zjarri të gjitha institucioneve dhe strukturave të sistemit të mbrojtjes civile si dhe qytetarëve që të raportojnë në kohë në numrat e emergjencave për çdo problematikë”, njoftoi ministria e Mbrojtjes.
Discussion about this post