Sfumohet objektivi Jadon Sancho për Juventusin. Sulmuesi i djathtë e mbylli sezonin i huazuar te Borussia Dortmundi, klub ku shpërtheu dhe u bë ndër më të mirët në rolin e tij.
Anglezi është rikthyer te Manchester United, por nuk ka ndërmend të vijojë karrierën në “Old Trafford” për sa kohë që trajneri do të jetë holandezi Erik ten Hag.
Bardhezinjtë e Juventusit po tentojnë ta transferojnë në Serie A, por e ardhmja e Sanchos quhet PSG. Kampionët e Francës kanë vepruar shpejt dhe kanë arritur një marrëveshje me agjentin e 24-vjeçarit.
Kryeqytetasit kanë gjetur gjuhën e përbashkët sa i përket pagës sezonale që do të përfitojë futbollisti në “Parc des Princës”. Tani është radha e marrëveshjes me United.
“Djajtë e Kuq” kërkojnë 60 mln euro për kartonin e lojtarit ofensiv, ndërkohë që te PSG janë gati të përfshijnë 3 lojtarë të tjerë në këtë operacion.
Emra si Nordi Mukiele, Milan Skriniar dhe Manuel Ugarte janë ata që u propozohen ishullorëve. Futbollistë që vlerësohen nga tekniku Ten Hag, kështu që së shpejti pritet dakordësia totale mes klubeve.
Discussion about this post