A do të bëhen me urë banorët e Ibës së Poshtme në Tiranë? Ura e Bonarakëve ndodhet në Iben e Poshtme, Njësia Administrative Berzhitë. Aktualisht ajo është urë e tipit pasarelë që përdoret nga banoret e zonës vetëm për lëvizjen e këmbësorëve. Para shumë kohësh ka filluar ndërtimi i një ure me gjatësi rreth 60 metra, e cila do te shërbente dhe për lëvizjen e mjeteve. Janë realizuar këmbët e urës nga ish- komuna, me hapësirë drite 4×14 m, dhe shtresa e sipërme e urës është e parealizuar.
Kryetari Erion Veliaj u ka premtuar përfundimin e ndërtimit të urës. Por prisni pak! Më parë, Lali Eri do të mbarojë pazaret me fondin e caktuar. Në fund do të shohim se si do të shkojë puna, por dyshojmë se nga mënyra si u procedua me tenderin, nuk do të ketë urë në afat dhe me cilësi.
Tenderi me “Flamur të kuq”
Erion Veliaj alias Lali Eri ka në dispozicion fondin prej 795 milionë lekësh që me TVSH parashikohet të shkojë në afro 954 milionë lekë (pra afërsisht 1 milion euro). Dhe për këtë ka njoftuar tenderin me objekt ‘Ndërtim Ura e Bonarakëve, Ibë e Poshtme’. Ky është një fond i madh, sepse Veliaj ka prekur edhe paratë e buxhetit të 2 viteve të ardhshme. Në dokument theksohet se paratë do të merren nga zërat e buxhetit afatmesëm 2024-2026.
Kështu shpenzohen paratë para se sa të arrijnë në Thesar dhe më pas bashkitë futen në borxhe. E thënë butë ky është keqmenaxhim. Përse zhvillohet tenderi kur nuk janë fondet në dispozicion. A është kjo shkelje e rregullave të administrimit të buxhetit.
Epo, kjo nuk ka rëndësi për Lali Erin! Ka bërë gjëra më të mëdha dhe nuk i ka hyrë gjembi! I vënë nën presionin e SPAK, që mund ta arrestojë për shumë dosje të hapura, ku implikohet kryetari i bashkisë Tiranë, Lali Eri i ka marrë tenderët me vrull për të mbaruar punë sa më shpejt me paratë e arkës.
Kështu, me nxitim e ka mbyllur edhe tenderin ne fjalë, por më pas e ka mbajtur kontratën për gati 2 muaj në sirtar.
Procedura për këtë tender është hapur me 6 qershor 2024 dhe më datë 25 është mbajtur faza finale.
Në këtë moment pritej që të zhvillohej ballafaqimi mes ofertave më të mira, shohim që kanë marrë pjesë 5 kompani. Por në fakt vetëm një prej tyre preku fazën e fundit. 4 kompanitë e tjera komisioni i skualifikoi me argumentin se kanë mungesë dokumentesh, gabim aritmetik në përllogaritjen e ofertës, apo deklarimin e gabuar të një topografi. Këtë moment ligji e ka zgjidhur duke krijuar një komunikim me operatorët që të mund të plotësojnë të metat në dokumente.
Si përfundim, Veliaj i hapi rrugën ofertës më të shtrenjtë të dorëzuar nga firma “BEQIRI” SHPK, me vlerë 74,581,447.50 lekë.
Ndërsa firmat e përjashtuara kishin oferta nga 611 milionë lekë në 715 milionë lekë. Nëse do t’i kishte marrë në konsideratë minimalisht, do të kursente 35 milionë lekë nga xhepat e qytetarëve dhe kontratat nuk do të mbyllej kështu me konkurrencë të cenuar.
Ligji nuk u zbatua dhe prandaj sot kemi një kontratë të vlerësuar nga Open Data Albania me “Flamurin e Kuq” për riskun e korrupsionit. Derisa të mbarojnë pazaret me fondin, banorët e Ibës së Poshtme do të vazhdojnë të kenë rrezikun e kalimit në urën e pambaruar që i ka dërrasat të amortizuara.
Gjendja e urës dhe e rrugës në këtë zonë pengon edhe turistët që duan të vizitojnë shpellën e Pëllumbasit. Gjithsesi, ky tender nuk përfshin riparimin e rrugës, vetëm ndërtimin e urës.
Si e la “Beqiri” urën e Jubës të pandrequr?
Siç e përmendëm më sipër, ky tender i dhënë pa garë dhe kompania përfituese nuk japin garanci se ura do të ndërtohet në afat. Kompania “Beqiri” shpk me pronar Neim Beqirajn ka treguar në të kaluarën se merr paratë dhe nuk kryen punën.
Kështu, në vitin 2016, kompania “Beqiri” firmosi me Bashkinë Durrës kontratën “Rindërtim i urës që lidh fshatin Jubë me Rrushkull dhe segmenti rrugor që lidh rrugën”. Vlera e fondit limit ishte 21 552 000,00 lekë pa përfshirë TVSH.
Ura 115 metra e gjatë dhe 4 metra e gjerë u rikonstruktua më në fund në vitin 2017 me fondet e Agjencisë Zvicerane për Zhvillim dhe Bashkëpunim (SDC) dhe bashkisë Durrës.
Por kjo rrugë vitin e kaluar ishte në gjendje të degraduar.
Për banorët e zonës, ura e tipit “Bejli” është kthyer në shqetësimin kryesor të tyre. Fotoja tregon situatën në qershor 2023, kur rruga Ura Durrës e detyruar nga protestat e banorëve po kryente disa arnime me dërrasa.
Në qershor të vitit 2017, Beqiraj mori nga Erion Veliaj tenderin për ndërtimin e rrugës “Danish Jukniu” në Tiranë me fondin limit 38 732 631,00 lekë.
Rruga duhej mbyllur për 6 muaj, por Beqiraj nuk arriti të mbyllte punimet në afat ashtu siç nënshkroi kontratën. Ç’ndodhi? Në prill 2018, Erion Veliaj i dha fond shtesë kompanisë që të vazhdonte punën. Pra, bashkia derdhi edhe 5 576 441 lekë tek xhepi i Neim Beqirajt.
Në 20 maj 2022, kjo kompani mori tenderin e rindërtimit të rrugës tek Currilat, e cila është kryer me cilësi të dobët.
Tenderi “Rikonstruksion rruga Currila segmenti hotel Ferrara – Guest House” e kishte fondin limit 37 248 896,00 lekë.
Kodra e Currilave në Durrës thuajse u lëshua në janar 2023 mbi rrugën mbi të cilën ngrihet, teksa shembja e skarpateve anësore dhe çarja e rrjetave mbrojtëse bëri që dherat të pushtonin aksin që lidh zonën me qytetin e Durrësit. Teksa kjo duket të jetë një situatë që përsëritet thuajse sa herë ka reshje të dendura shiu, ajo ç’ka del në pah është dështim i punimeve. “Por, pavarësisht këtij fakti, ende nuk është bërë asnjë ndjekje penale nga Prokuroria e Durrësit apo të ketë nisur ndonjë hetim për dëmin financiar të shkaktuar nga zbatuesit e projektit…” deklaronte në këtë kohë Dega e PD Durrës.
Tani e ka radhën ura e Ibës! Banorët nuk duhet të gënjehen me fjalët e Lali Erit, po të presin të kryhet puna!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post