Një shpërthim ka ndodhur këtë të premte në një pikë karburanti, në aksin rrugor Tiranë-Durrës. Nga të dhënat paraprake, mësohet se shpërthimi ka ndodhur te “Gega Oil”, teksa një bot po furnizonte pikën e karburantit.
Si pasojë e shpërthimit, dy persona u plagosën, punonjës në karburant.
“Rreth orës 14:00, në autostradën Durrës-Tiranë, në një pikë karburanti, është përfshirë nga flakët një automjet që transporton karburant. Për pasojë janë lënduar shtetasit Xh.K., 20 vjeç, banues në Kamëz dhe shtetasi E.P., rreth 35-vjeç, (të dy punonjës të karburantit), të cilët janë transportuar në spital për ndihmë mjekësore”, njoftoi policia.
Forcat zjarrfikëse kanë arritur të shuajnë flakët që u përhapën në pikën e karburantit.
Forcat zjarrfikëse në vendngjarje
Ndërsa në aksin Tiranë-Durrës u krijua një radhë e gjatë trafiku makinash, pasi efektivët bllokuan rrugën për arsye sigurie.
Pas fikjes së zjarrit, situata u normalizua.
“Ndërhyrja e shërbimeve zjarrfikëse dhe Policisë ka izoluar flakët duke shmangur përfshirjen nga zjarri të çisternave me karburant. Shërbimet e Policisë evakuan personat e tjerë që ndodheshin rreth zonës në rrezik. Zjarri është shuar tërësisht dhe lëvizja e mjeteve në të dy krahët e autostradës po vijon normalisht. Grupi hetimor ndodhet në vendngjarje dhe po punon për zbardhjen e rrethanave të ngjarjes”, thuhet më tej në njoftimin e bluve.
Discussion about this post