Familjarët e Rigels Rajkut (Noizy) kanë reaguar pas protestës së organizuar nga fansat e reperit, që pritet të mbahet pasditen e sotme në orën 19:00 para Ministrisë së Drejtësisë së drejtuar nga Ulsi Manja, duke kërkuar njëzëri jo ekstradimin e Noizyt drejt Kosovës.
Përmes një postimi në profilin e Noizyt në Instagram, ata kanë falënderuar fansat e këngëtarit për mbështetjen, por nga ana tjetër janë distancuar nga protesta, duke theksuar se nuk kanë ndërmarre organizim për asnjë protestë.
Nëpërmjet menaxherit Ermir Gjyzeli, në reagimin për mediat theksohet se familja po merret vetëm me rrugën ligjore për zbardhjen e të vërtetës.
Reagimi i plotë:
“Dje nëpërmjet mediave u informuam se do të organizohej sot një protestë përpara Ministrisë së Drejtësisë për lirimin e Rigelsit (Noizyt).
Duam të informojmë fansat e Noizyt, publikun e gjerë dhe mediat, se as familja e Noizyt, as stafi menaxherial nuk kanë ndërmarrë organizimin e asnjë proteste.
Ne, jemi në një proces gjyqsor dhe do ndjekim vetëm rrugën ligjore për zbardhjen e të vërtetës dhe pastrimin e baltës mbi emrin e Noizyt Duam të falenderojmë përzemërsisht fansat dhe kolegët e Noizyt për mbështetjen ndaj tij në këtë situatë absurde padrejtësie. Punë të mbarë të gjithë atyre që po punojnë drejt së vërtetës. Stafi menaxherial.”
View this post on Instagram
Kujtojmë se ditën e enjte, Gjykata e Tiranës la në qeli reperin Rigels Rajku (Noizy) dhe DJ e tij, Bahtjar Bajraktari, i njohur si DJ Crax, duke iu caktuar masat e sigurisë “Arrest me burg”.
Ata u arrestuan të mërkurën në Shëngjin, me qëllim ekstradimin drejt Kosovës, pasi akuzohen për dhunimin e personazhit të TikTok, Muhamet Iseni i njohur si Medi, dhe mikut të tij, ngjarje e ndodhur në orët e para të mëngjesit të 2 Gushtit në një klub nate në Pejë.
Mbi ta rëndon akuza për veprën penale “Lëndim i rëndë trupor”. Noizy dhe DJ CRAX u shpallën në kërkim nga Prokuroria e Pejës pasi nuk iu bindën kërkes së institucionit për t’u paraqitur për të dhënë deshmitë e tyre rreth ngjarjes. Tashmë pritet ekstradimi i Noizyt dhe DJ CRAX drejt Kosovës.
Në kërkim për këtë ngjarje është shpallur dhe reperi tjetër, Arkimed Lushaj, i njohur si Stresi, mbi të cilin rëndon akuza për veprën penale “Ndihma” nё kryerjen e veprës penale “Lёndim i rёndё trupor”.
Si Noizy, po ashtu edhe Stresi në reagimet e tyre kanë mohuar akuzat, teksa sipas tyre, kanë qenë persona të tjerë ata që i kanë rrahur, pasi situata kishte dalë nga kontrolli.
Medi Iseni dyshohet se u pre në besë nga Stresi, i cili dyshohet se e kishte ftuar për ta takuar, por ndërkohë ishte një “kurth”, për ta vendosur në të njëjtin ambient me Noizyn dhe grupin e tij.
Pasi Medi Iseni dhe shoku i tij u futën në një dhomë, aty ata u përballën me Noizyn dhe 7 persona të tjerë të grupit të tij, duke u dhunuar me doreza hekuri dhe sende të forta. Pas ngjarjes ata u dërguan me urgjencë në spital me plagë të shumta në kokë dhe trup.
Noizy dhe Medi Iseni janë përfshirë në konflikt edhe rreth dy vite më parë. Ngjarja ndodhi gjatë një koncerit të reperit,ku fansat e tij dhunuan duke qëlluar me grushte Medi Isenin.
Discussion about this post