Disa ditë pas largimit të Jona Sulit, agjencia e SASPAC do të ketë një tjetër drejtuese. Kryeministri Edi Rama i ka besuar postin e Drejtoreshës së SASPAC, Erdiana Çanos. Emërimi i Çanos ka ardhur pas shkarkimit të Sulit muajin e kaluar nga Këshilli i Ministrave.
Erdiana Çano njihet si bashkëpunëtore e Ramës teksa më herët ka mbajtur detyrën e drejtoreshës së agjencisë për Dialog dhe Bashkëqeverisje. Në media, emri i saj është përfolur se do të merrte detyrën e drejtueses së SASPAC para zyrtarizmit.
Shkarkimi i Jona Sulit erdhi vetëm pak kohë pas arrestimit të ish-ministrit të Shëndetësisë, Ilir Beqaj, nga SPAK, në lidhje me dyshimet për një skemë korrupsioni me fondet e Agjencisë së Koordinimit të Ndihmës së Huaj (SASPAC).
Para Sulit, kjo detyre është mbajtur nga Ilir Beqaj i cili dha dorëheqjen më 18 nëntor 2023, sapo mësoi se ishte marrë nën hetim nga SPAK për koncesionin e Sterilizimit. Në vitin 2021, ai u emërua në krye të SASPAC nga kryeministri Edi Rama, edhe pse ndaj tij po zhvilloheshin hetime për kontratat koncesionare në shëndetësi.
Pasi ish-ministri i Shëndetësisë u emërua në krye të Agjencisë që monitoron milionat e ndihmës nga Bashkimi Evropian, prokurorët dyshojnë se ai dhe vartësit e tij ngritën një skemë korrupsioni dhe pastrimi parash me fatura fiktive.
Discussion about this post