GJKKO lë në fuqi masat e sigurisë “arrest me burg” për Plaurent Dervishajn dhe Julian Meçajn.
Në seancën ku ishte i pranishëm si përfaqësues i SPAK drejtuesi Altin Dumani, nuk është bërë me dije mënyra se si dy të shumëkërkuar iu dorëzuan autoriteteve shqiptare, ndërsa avokatët kërkuan kohë të njihen me aktet.
Dervishaj dhe Mecaj janë shprehur para gjyqtares Rudina Palloj se kanë ardhur vetë në Shqipëri për tu përballur me drejtësinë dhe kanë kërkuar masa më të buta sigurie, pasi sipas tyre, nuk ka rrezik që ata të arratisen.
Masat e sigurisë këtë të enjte janë dhënë vetëm për dosjen e atentatit ndaj ish-prokurorit Arjan Ndoji ku humbi jetën shoferi i tij Andi Maloku dhe u plagos Aleksandër Jaho i njohur si Rrumi i Shijakut si dhe vetë Ndoji.
Teksa të akuzuarit thanë në gjykatë se erdhën me dëshirën e tyre në Shqipëri, një ditë më parë, Policia njoftoi zyrtarisht se “në bashkëpunim me partnerët ndërkombëtarë dhe Prokurorinë e Posaçme kundër Korrupsionit dhe Krimit të Organizuar, mundësoi sjelljen nga Emiratet e Bashkuara Arabe në Shqipëri të personave të shumëkërkuar Plarent Dervishaj dhe Julian Meçaj”.
Plaurent Dervishaj është person i shpallur në kërkim ndërkombëtar, pasi Gjykata e Posaçme kundër Korrupsionit dhe Krimit të Organizuar ka caktuar ndaj tij masën “arrest në burg” për “pjesëmarrje në grup të strukturuar kriminal” dhe “kryerjen e veprave penale nga grupi i strukturuar kriminal dhe organizata kriminale”.
Më datë 26.02.2005, në Durrës, Plaurent Dervishaj, në bashkëpunim me persona të tjerë dyshohet se kanë vrarë shtetasin Klodian Saliu, me armë zjarri.
Më datë 27.02.2005, Plaurent Dervishaj, në kuadër të grupit të organizuar kriminal, në bashkëpunim me subjekte të tjerë të hetuar, dyshohet se kanë vrarë Vajdin Lamajn dhe Artan Arsin, me eksploziv.
Ndërsa Julian Meçaj është person i shpallur në kërkim ndërkombëtar, pasi Gjykata e Posaçme kundër Korrupsionit dhe Krimit të Organizuar ka caktuar ndaj tij masën “arrest në burg” për “pjesëmarrje në grup të strukturuar kriminal”, “kryerja e veprave penale nga grupi i strukturuar kriminal dhe organizata kriminale”.
Më datë 01.11.2019, në autostradën Durrës-Tiranë, pranë mbikalimit të Shkozetit, është gjuajtur disa herë me armë ndaj automjetit të drejtuar nga Andi Maloku (i cili humbi jetën), ku pasagjer ishin edhe Arjan Ndoji dhe Aleksandër Laho. Nga hetimet, Julian Meçaj është identifikuar si një nga autorët, duke e kryer këtë krim në bashkëpunim me shtetas të tjerë. Për ngjarjen, nën akuzë është edhe Plaurent Dervishaj.
Lexo edhe:
Discussion about this post