Një sherr për motive pronësie mes dy familjeve në Fushë Milot, ku janë shënuar edhe të shtëna, ka përfunduar me plagosjen e një personi me armë zjarri dhe dy vëllezërve të tij me sende të forta.
Të lënduarit u konfliktuan me dy vëllezër dhe djalin e njërit prej tyre. Dy të parët u arrestuar, ndërsa i fundit u shpall në kërkim.
Ngjarja
“Shërbimet e Komisariatit të Policisë Kurbin, me marrjen e njoftimit se në fshatin Fushë Milot, po ndodhte një konflikt mes disa shtetasve, për motive pronësie dhe gjatë konfliktit kishte mbetur i plagosur me armë zjarri një shtetas dhe ishin plagosur me sende të forta dy të tjerë, menjëherë kanë shkuar në adresën e dhënë. Nga veprimet e para në vendngjarje rezultoi se në konflikt ishin përfshirë dy familje, për motive pronësie. Konflikti kishte nisur fillimisht me sende të forta dhe më pas në përdorim të armës së zjarrit”, tha policia lokale në një njoftim për mediat.
Sipas të njëjtave burime: Sokol Murati, djali i tij Valdano Murati dhe Pëllumb Murati, vëllai i Sokol Muratit, ishin konfliktuar me sende të forta për motive pronësie me tre vëllezërit shtetasit Y. V., S. V. dhe E. V. Si pasojë e konfliktit janë dëmtuar me sende të forta shtetasit Y. V. dhe S. V., si dhe është plagosur me armë zjarri shtetasi E.V.. Të tre të dëmtuarit janë aktualisht në spital, në kujdesin e mjekëve.
Shërbimet e Policisë vendore, me mbështetjen e Forcës Kombëtare të Sigurisë Njësia Shkodër, kanë bërë të mundur kapjen, shoqërimin në Komisariat dhe arrestimin e shtetasve Sokol Murati dhe Pëllumb Murati, si dhe kanë shpallur në kërkim Valdano Muratin. Gjatë kontrollit në banesën e Sokol Muratit, Policia gjeti dhe sekuestroi në cilësinë e provës materiale një sasi municioni luftarak.
Hetimet për rastin vijojnë.
Discussion about this post