Rasti i transportit të dyshuar të mbi 800 tonëve me mbetje toksike nga Porti i Durrësit drejt Tajlandës më 4 Korrik të këtij viti dhe që kanë dalë nga zona e ish-Metalurgjikut të Elbasanit, po i nënshtrohet edhe hetimeve për të zbuluar përgjegjësit e shkeljes.
Hetimet janë shtrirë në dy qytete; Elbasan dhe Durrës. Mbetet enigmë dinamika dhe itinerari se si janë transportuar këto ngarkesa të mëdha drejt portit dhe se si janë lejuar të imbarkohen në anije.
Fillimisht ka qenë Policia e Durrësit që ka kryer procedurat paraprake të verifikimit dhe procedimit penal, duke ia kaluar më tej dosjen Prokurorisë së Rrethit. Policia konfirmon kryerjen e procedurave, teksa e dyshuar për transportin e mbetjeve si nënkontraktor është kompania “Sokolaj”.
Gjithashtu janë duke u kontrolluar dokumentet doganore përkatëse nëse procedurat janë kryer siç duhet apo dhe nëse ka mangësi në to. Nga ana tjetër Dogana ka deklaruar se nuk ka pasur dijeni për ngarkesën.
Nën dyshim dhe verifikim është edhe kompania “Kurum”, nga dhe kanë dalë këto mbetje të kromit dhe Kadiumit, të nxjerra nga filtrimi i shkrirjes në furrën e çelikut dhe që cilësohen të dëmshme për shëndetin. Kurse kompania “Sokolaj shpk” është duke u hetuar sipas Nenit 202 të Kodit Penal, ‘transportimi I mbetjeve toksike’.
Nga hetimet deri me tani rezulton se i ka blerë mbetjet pranë “Kurum”, me destinacion Tajlandën, por po kryhen verifikime nëse ka edhe subjekte apo individë të tjerë përgjegjës.
Alarmi për mbetjet u dha më 5 gusht nga organizata joqeveritare e kontrollit botëror të mbetjeve toksike, “Basel Network Center” dhe dy ditë më pas u publikua nga media “Bloomberg”, duke vënë në lëvizje autoritetet. Tajlanda i ka kthyer mbrapsht dy anijet e kompanisë “Maersk”, “Compton” dhe “Candor”, me 100 kontejnerë në bord.
Discussion about this post