Sikurse kishte paralajmëruar më herët, kryeministri Edi Rama ka prezantuar sot platformën për “Konsultimin e madh Kombëtar”, që sipas tij për vendimmarrjet e rëndësishme do merret edhe mendimi i qytetarëve.
Rama tha në një deklaratë për mediat se do ndërtohet një pyetësor që do t’i drejtohet çdo shqiptari për të ecur përpara dhe lënë pas grindjet politike.
“Në prag të një Viti të Ri mundësish të reja, Qeveria vendosi t’i japë jetë një nisme të re demokratike, duke hapur procesin gjithëpërfshirës të Këshillimit Kombëtar për Shqipërinë. Me një pyetësor drejtuar çdo shqiptari, në Shqipëri apo në botë, do të zhvillojmë një kuvendim popullor, ku duam mendimin tuaj mbi çështje me rëndësi strategjike për vendin, ekonominë, shoqërinë. Është koha t’i lemë pas llogoret e sherrit politik që të hedhim hapa të mëdhenj përpara, duke u këshilluar së bashku për vendime me rëndësi politike, ekonomike e sociale. Le të dëgjojmë njëri-tjetrin si njerëz të këtij vendi të bekuar, si shqiptarë e shqiptare që na ndajnë shumë”, tha Rama.
Kryeministri u shpreh se shqiptarët do të pyeten për çështje duke nisur nga anëtarësimi në BE e vetoja e Bullgarisë, Ballkani i Hapur apo dhe dhuna në familje.
Discussion about this post