Dhjetëra qytetarë serbë u mblodhën sot para një objekti që ishte përdorur nga komuna paralele serbe në Mitrovicë të Veriut, duke thënë se po përpiqen që të kthehen në punë.
Personat që protestuan të hënën ishin punonjës të administratës të komunës paralele serbe në këtë komunë.
“Ne sot kemi ardhur për t’u lajmëruar në punë dhe jo për të protestuar. Rreth 1700 punëtorë kanë mbetur pa paga ndërkohë që neve askush nuk kana ka informuar asgjë”, ka thënë njëri prej pjesëmarrësve në protestë.
Tubimi vjen disa ditë pasi autoritetet e Kosovës mbyllën pesë institucione paralele serbe në veri të Kosovës, përfshirë komunën paralele të Mitrovicës, duke thënë se këto institucione po punonin nën udhëheqjen e Serbisë, duke e “cenuar kushtetutshmërinë dhe ligjet e Republikës së Kosovës”.
Aksioni i 30 gushtit, i kryer nga institucionet e Kosovës u cilësua si veprim i njëanshëm dhe i pakoordinuar nga bashkësia ndërkombëtare dhe po ashtu u kundërshtua nga Lista Serbe, partia kryesore e serbëve lokalë në Kosovë që ka mbështetjen e Beogradit, dhe nga zyrtarët në Serbi.
Policia e Kosovës ka njoftuar se protestat e mbajtura sot në dy lokacione në veri të Mitrovicës kanë përfunduar të qeta dhe pa incidente.
Sipas njoftimit të policisë thuhet se protestat ishin të paparalajmëruara, por pavarësisht kësaj policia kishte marrë masat e nevojshme për të siguruar rendin dhe qetësinë publike.
Protestat, të cilat filluan në orët e hershme të mëngjesit, përfunduan rreth orës 08:45 pa ndonjë incident.
Discussion about this post