Bllokohet Thumanë-Kashar, banorët protestojnë për herë të dhjetë -

Një ditë pas protestës para parlamentit gjatë seancës së parë plenare për këtë sezon, banorët e Krujës dhe Fushë Krujës dolën sërish për të bllokuar rrugën Thumanë Kashar.

Banorët protestojnë për herë të dhjetë në këtë aks, teksa nuk mungojnë shtyrjet dhe përplasjen me policinë në rrugë. Protestuesit janë shpërndarë nga Thumana në drejtim të Mamurrasit dhe anasjelltas, duke mbajtur të bllokuar të dy anët e autostradës, pasi policia po bëhej gati të ndërhynte për t’i shpërndarë.

Kërkesa e tyre është hyrje dhe dalje nga ky aks për zonat e tyre. Pas ndërtimit të kësaj autostrade ata pretendojnë se janë izoluar pas aksi nuk ka asnjë hyrje dhe dalje për zonat e Krujës dhe Fushë Krujës, dëmtuar mbi të gjitha aktivitetet e tyre ekonomike dhe jetën normale.

Deputetja e PD-së Andia Ulliri, në një prononcim nga protesta e banorëve në rrugën Kashar-Thumanë, tha se rruga është një projekt i ndryshuar.

“Rruga është një projekt i ndryshuar. Këtu është gjaku i banorëve të Krujës. Deputetët nuk u ballafaquan me protestuesit nga Kruja, Fushë Kruja dhe Thumana. Ne kërkojmë të drejtën tonë, të kemi hyrje-dalje.

Projekti kishte dy nyje shkëmbimi, që nuk janë realizuar. Institucionet të reagojnë. Këtu jemi përballë disa shkeljeve ligjore. Ministria e Infrastrukturës dhe ARRSH nuk na kanë thënë se kush ka bllokuar hyrje-daljet”, tha Andia Ulliri.

Koordinatori rajonal në PD për Tiranën, Klevis Balliu, në një prononcim nga protesta e banorëve të Krujës, tha se banorët kërkojnë vetëm hyrje-dalje në autostradë.

“Nëse bëhet hyrje-dalja, protesta mbyllet. Këtu është qytet dhe si mund ta zbulosh qytetin. Banorët nuk janë kundër projektit. Banorët janë kundër projektit që ka ndryshuar Balluku.

Pse duhet të përplaset policia me banorët që të fitojë lekë Balluku? Nëse këta e duan me forcë, këtyre po u vjen dita për të marrë atë që meritojnë”, tha Balliu.

Ndërkohë, protestuesit në Thumanë-Kashar duket se këtë herë kanë ndjekur një plan B. Ndryshe nga herët e tjera, kanë vrapuar në autostradë.

Policët i kanë ndjekur nga pas protestuesit. Për disa momente, autostrada është bllokuar dhe është krijuar trafik.

Efektivët janë duke negociuar me banorët, me qëllim që të lirohet autostrada.