Një vrasje e dyfishtë ka ndodhur këtë të martë në Kurjan të Fierit, ku një 50-vjeçar dyshohet se ka qëlluar për vdekje me armë zjarri dy persona, xhaxha e nip.
Viktimat janë Lavdimir dhe Gramos Kurtaj, 45 dhe 52 vjeç, ndërsa autori i dyshuar, tashmë i arrestuar, është Altin Kuka, 50 vjeç.
Dyshimet paraprake, nisur edhe nga dëshmia e autorit, janë se shkak i krimit të ndodhur rreth orës 14:00 ka qenë një konflikt i çastit që ka pasur fillimisht djali i autorit me dy viktimat.
Pasi qëlloi për vdekje Lavdimir dhe Gramos Kurtajn, Altin Koka është vetëdorëzuar në polici bashkë me armën e krimit.
Pamje nga vendngjarja
Të dhënat e hetimeve paraprake i konfirmoi në një deklaratë për mediat një zyrtar i policisë lokale.
“Rreth orës 14:00 në fshatin Kurjan të bashkisë Roskovec ka ndodhur ngjarje e rëndë kriminale, ku shtetasi Altin Kuka, banues në Fier, dyshohet si autor i ngjarjes kriminale duke vrarë me armë zjarri automatik, dy shtetas xhaxha dhe nip, të cilët kanë ndërruar menjëherë jetë në vendngjarje. Pas kryerjes së këtij akti kriminal, shtetasi Altin Kuka është vetëdorëzuar në polici së bashku me armën e krimit. Policia në bashkëpunim me prokurorinë po punojnë për dokumentimin e plotë të kësaj ngjarje”, deklaroi Shpëtim Hasanaliaj.
I pyetur se çfarë ka deklaruar autori kur është vetëdorëzuar, zyrtari i policisë zbuloi se Altin Koka “fillimisht ka deklaruar se unë e kam kryer këtë akt kriminal për shkak të një grindje që ka pasur djali i tij me dy viktimat”. “Një grindje e momentit”, saktësoi.
Discussion about this post