Banorët e fshatit Kasallë në Kamëz kanë ngritur shqetësimin se banesat e tyre janë të ekspozuara ndaj grabitësve në zonë. Ata tregojnë se janë kryer 10 grabitje në një hark kohor prej 10 ditësh, ndaj nuk ndihen të sigurt. Për të mbrojtur pronat e tyre banorët e Kamzës kanë filluar të bëjnë roje natën.
“Po detyrohemi të bëjmë shërbim vetë. Kemi ruajtur vetë shtëpitë me komshinjtë, njerëzit, dy netë njëri e dy netë tjetri sepse nuk po gjejmë rehati. Çdo natë organizohemi me radhë që të mbrojmë shtëpinë dhe familjen tonë”, tregojnë banorët.
Njëri nga banorët tregon se shtëpia përballë banesës së tij është tentuar të vidhet nga persona të maskuar dhe me armë të ftohta në dorë, duke shkaktuar panik në zonë.
“Po na bëhen vjedhje çdo natë pothuajse. Shtëpinë që ndodhet përballë e kanë bastisur, kanë bastisur katin e parë dhe kanë kaluar në kat të dytë. I zoti i shpisë është zgjuar, ata janë frikësuar dhe janë larguar. Ka pasur një levë njëri në dorë, nuk kanë marrë gjë aty por me frikë, me grua dhe fëmijë të vegjël”, deklaron njëri prej banorëve.
Ata rrëfejnë që keqbërësit po marrin ç’të munden nga pasuria e tyre.
“Ka pasur raste që ka hequr gomat e makinës, bagëti, bizhuteri, flori. Para dy-tre netësh njërit erdhën ti marrin lopën, nuk arritën se doli i zoti i shtëpisë.
Ndonëse vjedhjet janë të vazhdueshme, ata shprehen se policia nuk është kujdesur që të garantojë sigurinë e tyre, ndaj apelojnë që të merren masa.
“Policia këtu nuk vjen asnjë rast, për të dalë, për të kaluar për patrullim natën. Shqetësuar për rendin dhe qetësinë, sepse nuk po gjejmë qetësi. Ne apelojmë më shumë që të ketë kontrolle të policisë”, thonë banorët e Kasallës.
Disa kryefamiljarë iu duhet të punojnë natën, por hasen me frikën e familjes dhe fëmijëve që lejnë në shtëpi, ku mund të sulmohen nga momenti në moment.
“Unë punoj natën, nusen dhe fëmijët në shpi. Kush mi mbron mua ata? Nëqoftëse mi gjen gjë kush mi mbron? Mos të punoj kush i mban? Ose të rri roje për familjen ose do punoj t’i mbaj”, ngre shqetësim një tjetër banor.
Ndonëse raste të tilla janë denoncuar, policia ende nuk ka vënë në pranga asnjë nga autorët.
Discussion about this post