Gjykata e Posaçme e Apelit lehtësoi pozitat e mjekëve në dosjen e njohur si Onkologjiku, duke zbutur masën e sigurisë për farmacistin Florian Marku, i cili do të hetohet në detyrim për t’u paraqitur.
Nga ana tjetër e njëjta gjykatë vendosi të shuajë masën e sigurisë për ish-zëvendës drejtoreshën e QSUT, Brikena Qirjazi dhe Halil Gashin, babain e mjekut Edmond Gashi.
Në masë arresti në shtëpi për këtë dosje është vetëm ky i fundit, masa e të cilit u konfirmua edhe këtë të mërkurë.
Nën hetim për këtë dosje por që nuk kishin ankimuar vendimin e masës, janë edhe mjekja Alketa Pere, Emiljano Lela, Drilona Kishta, të hetuar në masën e detyrimit për t’u paraqitur në policinë gjyqësore.
Ishte fillimisht Prokuroria e Tiranës e cila i mori ata nën hetim me dyshimet se ishin bërë pjesë e një skeme për dërgimin e pacientëve të diagnostikuar me tumore drejt spitalit privat, që administrohej nga babai i mjekut Edmond Gashi.
Apeli gjithashtu ngriti konfliktin e kompetencës për një pjesë të dosjes dhe do i kërkojë Gjykatës së Lartë nëse duhet të vijojë të hetohet nga SPAK apo jo.
Sipas hetimit të deritanishëm, të dyshuarit kishin ngritur një skemë abuzive të zvarritjes së trajtimit të të sëmurëve me kancer në Spitalin Onklologjik, me qëllim dërgimin e tyre në një klinikë private. I njëjti hetim, zbuloi mosvënien në punë të pajisjes së kobalto-terapisë tek Onkologjiku, e instaluar prej vitit 2021, si edhe lënien e saj në një ambient të papërshtatshëm, duke u bërë burim i rrezikshëm radioaktivitetit për stafin mjekësor dhe pacientët. Po ashtu, nga hetimi u dokumentua kontrabandimin e ilaçeve të kancerit të spitalit dhe tregtimit e tyre në dy farmaci private.
Discussion about this post