Tani që afrohen zgjedhjet, kryetari i Bashkisë Peqin, Bukurosh Maçi, ka nxjerrë nga nxjerrë me urgjencë nga sirtari projektin e ndërhyrjes në një rrugë që ka 5 vjet që është shembur. Kjo rrugë gjysmë e shembur, që vë në rrezik jetën e banorëve që kalojnë aty, është lënë në mëshirë të fatit. Nga ana tjetër, kryetari nuk mund të thotë që po investon për qytetarët. Siç po zhvillohet tenderi, del se Maçi ka synim kryesor pazarin me këtë fond.
Në 2019, prej reshjeve të shumta, Lumi Shkumbin u fry dhe për pasojë rruga u dëmtua në një pjesë të saj. Qysh atëherë banorët e raportuan rastin në media, duke i bërë thirrje autoriteteve të merrnin masa, pasi vihej në rrezik jeta e tyre.
Foto, viti 2019
Por e vetmja gjë që bëri bashkia ishte vendosja e disa kubave prej betoni rreth pjesës së shembur, siç duket në foto.
Kështu vazhdoi situata, edhe pse në vitin e shkuar sërish qytetarët u ankuan në media, duke thënë që çdo vit kur ka reshje kjo rrugë dëmtohet dhe bëhet e pakalueshme. Por, edhe viti 2023 kaloi në atë gjendje.
Foto, Viti 2023
Tenderi në shkelje
Tani më në fund u gjet fondi dhe duket se do të bëhet diçka, të paktën para zgjedhjeve, sepse për këtë dimër punimet do të zvarriten. Kështu më datë 22 gusht 2024 është hapur gara për tenderin me objekt ‘Ndërhyrje Emergjente në Argjinaturën e Lumit Shkumbin për shmangien e shembjes së rrugës Cengelaj – Shezë, Bashkia Peqin’.
Për këtë punë janë ndarë 500 milionë lekë, por kontrata pritet të shënojë një vlerë akoma më të lartë kur të shtohet TVSH. Nëse ndërhyrja do ishte bërë në kohë, do duheshin më pak shpenzime, por u pritën zgjedhjet. Komisioni i Maçit e ka mbyllur procedurën më 9 shtator 2024, teksa ishin 3 kompani që bënë 3 oferta të ndryshme.
Bashkimi i operatorëve “LLAZO”sh.p.k & VIANTE KONSTRUKSION sh.p.k & LIS KONSTRUKSION sh.p.k kishin ofertën më të lirë me vlerë 373 milionë lekë. Por kjo ofertë është skualifikuar për shkak se firmat nuk kanë deklaruar disponimin e disa pajisjeve të theksuara në dokumentet standarde.
Menjëherë më pas është skualifikuar edhe oferta e bashkimit të operatorëve ’LLUCA” sh.p.k & “T&J Construction” sh.p.k. Rrjedhimisht për në fazën finale mbeti vetëm oferta e dorëzuar nga bashkimi i operatorëve “ASI-2A CO” sh.p.k. – “Shendelli” sh.p.k, me vlerë rreth 500 milionë lekë.
Më datë 19 shtator 2024 është bërë publike kontrata, e skuqur nga shkeljet.
Open Data Albania i ka vendosur tenderit “Flamurin e Kuq”, shenja që tregon riskun e korrupsionit.
Kjo kontratë u fitua nga dy eksponentë të favorizuar vazhdimisht prej zyrtarëve të korruptuar të tenderave. Njëri është Astrit Gjikondaj, i cili me kompaninë e tij ka përfituar deri tani 171 kontrata për punë publike, shumicën e të cilave me “Flamur të kuq”. Marrja e tenderave përmes korrupsionit është evidentuar edhe nga KLSH në auditimin e Bashkisë Himarë.
Dyshja Andrea Gjikondaj dhe Astrit Gjikondaj nënvizohen për tenderat e rikonstruksionit pjesor të Shkollës 9-vjeçare Himarë si dhe për ujësjellësin e zonës Barmush, Hore dhe Vranisht, pasi kompania e tyre ASI-2A CO nuk plotësonte kriteret.
Ndërsa biznesmeni tjetër përfitues i tenderit është Yzedin Bozhaj, i përkëdhelur vazhdimisht nga qeveria me koncesione dhe tendera të pamerituar. Nisur edhe nga “CV” e dy përfituesve, nuk pritet që projekti të mbarojë në kohë dhe me cilësi, pavarësisht premtimeve që kanë marrë banorët.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post