Gjykata e Posaçme ka dënuar me 36 vite burgim në total ish-truprojën e ish-ministrit të Brendshëm Saimir Tahiri dhe 2 personat e tjerë të pandehur të dosjes penale të operacionit të koduar “Shpirti”, ku për pjesën tjetër të grupit hetimet, dënimet janë dhënë më herët.
Trupa gjykuese pranoi pretencën e SPAK-ut dhe këtë të premte shpalli vendimin. Dosja ishte procedim i nisur në vitin 2017 në Itali dhe më pas në vitin 2019 nga SPAK.
12 vite izolim ishte vendimi i GJKKO për ish-shoqëruesin e Tahirit, Agursin (Paul) Deda, por për shkak të gjykimit të shkurtuar do të vuajë 8 vite burgim. Po këtë masë dënimi morën edhe dy të tjerët, Leonidha Sejdiaj dhe Hamid Seferi, po me nga 8 vite izolim secili, me gjykim të shkurtuar. Të tre u shpallën fajtorë për “trafik të narkotikëve” dhe “grup të strukturuar kriminal”.
Vendimi u dha nga trupa gjykuese e përbërë nga gjyqtarët Aurel Arapi, Ilir Përdeda dhe Ardit Mustafaj.
Dy truprojat e ish-ministrit Saimir Tahiri janë Paul (Agustin) Deda dhe Hekuran Marku, njëri i arrestuar në Francë dhe tjetri në Gjermani, të ekstraduar dhe tashmë dënuar.
Të dy, sipas hetimeve, ishin të përfshirë në trafikun ndërkombëtar të kanabisit të grupit kriminal i drejtuar nga Ilirjan Duçellari.
Më herët, edhe Hekuran Marku është dënuar me 8 vite burgim nga GJKKO dhe Apeli për “trafik të narkotikëve” dhe “grup të strukturuar kriminal”.
Discussion about this post