Partizani dhe Tirana përballen sot në orën 20:00 në “Air Albania” për derbin numër 175 mes tyre në histori. Pak orë para sfidës më të ‘luftuar’ në Shqipëri, bëhet me dije se janë afro 10 mijë bileta të shitura, ndërkohë që tifozët e kanë lënë blerjen edhe në çastet e fundit.
Grumbullimi i të dyja grupeve të tifozerisë ka filluar dhe pritet nisja e tyre për në stadium, gjë që do bëhet në mënyrë të organizuar dhe të shoqëruar nga policia, për të shmangur çdo përplasje apo incident.
Policia ka marrë edhe masat e duhura duke bllokuar rrugët, për të bërë sa më të lehtë kalimin e tifozëve për në “Air Albania”. Mësohet se tifo-grupi i Tiranës, “Fanatics” kanë blerë 4 mijë biletat pas portës ku do vendosen, çka pritet që atmosfera mes tyre dhe “Guerrils” të jetë e zjarrtë.
Pas pesë javëve të këtij sezoni, Partizani me tetë pikë mban vendin e katërt, ndërsa Tirana me pesë pikë vendin e shtatë. Bardheblutë e Bledi Shkëmbit nuk e kanë shijuar ende fitoren këtë sezon, ndërsa të dy stolat janë të rinj.
Te Partizani trajner është serbi Aleksandër Veselinovic, që ka vetëm pak javë në drejtim të skuadrës. Për shumë nga futbollistët ky do jetë derbi i parë, me Tiranën që ka bërë shumë ndryshime në organikë.
HISTORIA E DERBIT
Takimi i parë mes Tiranës dhe Partizanit është luajtur më 30 mars 1947. “Demat e Kuq” fitonin 8-0, duke sigluar kështu edhe fitoren më të thellë derimë tani në derbi. 38 vite më vonë, më 22 shtator 1985, Tirana do t’i kthente reston Partizanit, të cilin e mundi 7-3.
Rezultati më i thellë i sezoneve të fundit është ai i vitit 2020, kur bardheblutë fitonin me shifrat 5-1, si shpagim për mbi pesë vite pa fituar në duelet me Partizanin. 174 takime janë luajtur deri tani mes Partizanit dhe Tiranës në periudhën 1947-2024 në të gjitha kompeticionet; Kupë dhe kampionat. Partizani ka fituar më shumë sesa Tirana në derbi, plot 73 ndeshje.
Bardheblutë numërojnë 47 fitore, ndërkohë që 54 ndeshje të tjera janë mbyllur në barazim. 236 gola ka shënuar skuadra e kuqe, përkundrejt 188 të bardhebluve. Golat e fundit në derbi për Partizanin janë shënuar nga Gueye Maguette me dopietë me një dopietë.
Në anën tjetër shënonte Kristal Abazaj, por nuk mjaftonte. Të dy lojtarët nuk janë më pjesë e klubeve, teksa ddeshja e 28 prillit përfundoi me shifrat 1-2 për Partizanin, që nuk humbet prej shtatë derbesh radhazi.
Partizani nuk humbet në derbi që nga dhjetori i vitit 2022, kur i mposhte Xhixha me një paraqitje fantastike dhe dopietë. Më pas, në shtatë ndeshje gjithçka ka folur për Partizanin.
gijotina.com/
Discussion about this post