Oltion Çaçi i firmos 700 milionë lekë pa garë Arbër Abazit për riparimin e një shkolle

Nxënësit e Ksamilit kanë nisur vitin mësimor, ndërsa kryebashkiaku i Sarandës, Oltion Çaçi, ua mbyll shkollën se tani u kujtua të bëjë riparimin e saj.

Fjala është për shkollën 9- vjeçare “ 5 Dëshmorët” në Ksamil. Projekti i rikonstruksionit parashikon 6 muaj punime, por duke marrë parasysh vonesat, pritet që të paktën për 1 vit godina të qëndroje e mbyllur dhe nxënësit të transferohen në një shkollë tjetër. Në pazar për këtë punë janë 70 986 938 lekë, por duke përfshirë TVSH-në, kontrata pritet të jetë më e madhe.

Punimet për rikonstruktimin përfshijnë fasadën e shkollës,  prishje suvatimesh; shtresave të tavanit, izolim çatie dhe ndërrim të hidrosanitareve që janë dëmtuar. Gjithsesi, oferta tregojnë se fondi limit është shumë më i lartë se sa vlera e tregut. Njëri nga operatorët ekonomik pjesëmarrës (INA shpk) në treg ka ofruar ta bëjë këtë punë me 51,328,042 lekë, ndërsa një tjetër (C O L O M B O Shpk) me 53 696 730 lekë. Diferenca kaq e madhe e fondit me propozimet e bizneseve tregon hendekun që krijon korrupsioni me vlerën faktike të punimeve.

Në dokument rezulton që për këtë tender fillimisht kanë shfaqur interes 7 kompani, 5 prej tyre  u skualifikuan me justifikimin se nuk përmbushin specifikimet teknike, por pa qartësuar se çfarë. Më pas është skualifikuar edhe një tjetër ofertë, duke lënë kështu të vlefshëm vetëm aplikimin e firmës  ALKO IMPEX CONSTRUCTION me vlerë 688 milionë lekë. Nëse do të merrej në konsideratë ndonjë nga ofertat e skualifikuara, fondi limit do të kursehej minimalisht 100 milionë lekë.

Open Data Albania e ka vlerësuar tenderin me “Flamur të kuq”, që është shenja e riskut të korrupsionit.

Kryetari Çaçi e kishte paracaktuar se tenderin do ta merrte Arbër Abazi, nipi i ish-deputetit dhe biznesmenit Sadri Abazi.

Kujtojmë që pak ditë më parë, Gijtoinë.com denoncoi tenderin me objekt ‘Qendra rinore Sarandë’ i cili u dha pa garë. Sipas dokumenteve për planin konstruktiv, me këtë tender do të bëhet rikonstruktimi i Qendrës Rinore. Kryebashkiaku i dha dritë jeshile tenderit 100 milionë lekë pa garë në favor të Astrit Gjikondajt.

©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016