Kosova po përballet me krizën energjitike duke bërë që shumë zona të mos furnizohen dhe të mbeten në errësirë. Lidhur me këtë ka reaguar kryeministri Albin Kurti, i cili gjatë fjalës së tij në Mbledhjen e Këshillit të Përgjithshëm të LVV-së u shpreh se kjo situatë e ka gjetur shtetin të papërgatitur. Sipas tij fajin e ka qeveria paraardhëse që nuk kanë marrë vendimet e duhura për të ardhmen e vendit, e madje kanë vjedhur duke krijuar një kolaps.
“Në kohën që po e mbajmë këtë mbledhje të Këshillit të Përgjithshëm po përballemi edhe me një sfidë tjetër një krizë energjetike të shkaktuar sa nga faktorë të jashtëm jashtë kontrollit tonë po aq nga mungesa e vizionit për të marrë vendime për të ardhmen nga ata që qeverisën për dy dekada. Derisa kërkesa për energji është rritur çdo vit, prodhimi nga KEK-u ka mbetur i njëjtë e ndërkohë ka pasur edhe vjedhje edhe vendime te gabuara që e kanë sjellë sektorin energjetik buzë kolapsit” tha Kurti.
Kurti shtoi se e kupton shqetësimin e qytetarëve që po vuajnë pasojat e kësaj krize energjitike, por shprehet se rrugëtimi i qeverisjes së tij mbetet plot sfida për shkak të qeverisjes që ka lenë vendin në terr.
“Unë e kuptoj frustrimin e qytetarëve me mungesën e energjisë elektrike, më besoni se edhe unë jam i frustrutar, por le të jetë ky një rikujtim për gjendjen në të cilën ata që qeverisën për dy dekada na lanë shtetin sepse si njerëz të territ që ishin që punët i bënin natën e larg syrit të qytetarëve ata s’kishin se si ta lenin Kosovën ndryshe pos në terr, por ajo epokë ka përfunduar. Rrugëtimi që kemi filluar së bashku është me plot sfida por do të na dërgojë në ditë më të mira”, ka thënë Kurti.
Kurti gjithashtu u shpreh se Kosova do të planifikojë një zgjidhje të situatës përmes propozimeve afatgjata që lidhen me format e ndryshme të të prodhuarit energji elektrike.
“Në botë ka alternativa të ndryshme për prodhimin e energjisë”, tha ai ndër të tjera.
Ministria e Ekonomisë në Kosovë bëri me dije se do të shqyrtohet çdo rast i ndërprerjes së furnizimit me energji elektrike në çdo zonë.
Discussion about this post