Artisti i rekordeve Guinnes, Saimir Strati ka shprehur shqetësimin e tij se në Shqipëri nuk ka vend ku të ekspozohen punimet e tij, të cilat kanë dhe një vëmendje të veçantë, sidomos jashtë vendit.
Artisti ka treguar se, sapo ishte kthyer nga Portugalia ku kishte marrë pjesë në një festë të organizuar me rastin e 10-vjetorit të rekordit të tij me portretin e shkrimtarit të madh José Saramago.
“Sa u ktheva nga Portugalia, ku u festua 10-vjetori i rekordit tim Guinnes, ku kam bërë me rreth 500 mijë tapa vere portretin e shkrimtarit të madh botëror, dhe portugez sigurisht, José Saramago. Vizitohet nga një numër i madh turistësh sepse rrallë ndodh që një sipërfaqe aq e madhe të jetë dhe rekord Guinnes.
U organizua në festë shumë e bukur, se unë u emocionova se vepra ishte njësoj si para dhjetë vitesh. Më bëri përshtypje se ishin vendosur dhe një nga pajisjet që kontrollonte temperaturën dhe nëse futeshin 10 veta njëherësh, e rregullonte.
Më preku përkujdesja e tyre sepse veprat e artit janë si fëmijët dhe do të dihet si ‘t’i martojmë’.
Nga 11 rekorde që unë kam, dy janë në Prishtinë, një në Turqi dhe një në Portugali. Të tjera unë i kam bërë këtu, por nuk kam pasur fatin ose mundësinë që unë t’i ekspozoj.
Jim Morrison thotë që klithma e artistit është si klithma e fluturës. Kur i ngulim ato gjilpërat e vogla, edhe ajo ka klithur. Unë jam me origjinë nga Vlora, kështu që ne edhe kur na ndodhin fatkeqësi i marrim me qira ata që na qajnë”, tha artisti Saimir Strati.
Discussion about this post