Erion Veliaj e ka futur biznesmenin Hamza Islamaj në listën e të favorizuarve në tendera. Këtë herë kryebashkiaku i Tiranës do t’i japë nga fondet e rrugëve. Bashkia ka zhvilluar prokurimin me objekt ‘Rehabilitimi infrastrukturës rrugore në Njësinë Administrative Dajt + Shën Gjergj + Zall Bastar’. Konkretisht do të bëhet shtrimi me asfalt i 3 rrugicave në fshatrat që ndodhen rreth 10 km larg qendrës së Tiranës.
Nisja e punimeve që do të bëhet në rrugën që të çon për fshatin Priskë. Kjo ka një gjatësi totale prej 3.3 kilometra dhe është degëzim i rrugës se Sh54 (Dajt-Qaf Priskë-Shëngjergj).
Kjo është gjendja aktuale e rrugës, e cila në fakt është e shtruar me asfalt, pasi aty kalon edhe një linjë urbani, por në të nuk është vënë dorë prej vitesh, prandaj edhe është amortizuar.
Kjo është edhe taktika e bashkisë, i lë rrugët pa mirëmbajte me vite, më pas bën ndërhyrje urgjente, por rrjedhimisht edhe për më shumë shpenzime. Sidomos në këtë moment para zgjedhjeve, projekti merr vlerë elektorale.
Në projekt përfshihet edhe shtimi me 5 cm asfalt i rrugës për në Fshatin Fezaj. Kjo është një rrugë e kategorisë D, segment lokal rural me gjatësi totale 560 metra.
Në fakt është një rrugicë fshati, ku është e aksesueshme edhe për makina, por ka nevojë të shtrohet me asfalt.
Gjithashtu, do të rikonstruktohet edhe “Rruga e Fshatin Vërri”, e cila është e rrethuar kryesisht nga objekte të ulëta 2-3 katëshe. Rruga ka një gjatësi rreth 530 metra, e cila gjithashtu ka parametrat e favorshme dhe Bashkia do të ndërhyjë me një shtresë çakëll dhe asfalt në trashësi 4-5 cm. Në total do të shtrohen 4.4 km rrugë!
Tenderi me “Flamuri të Kuq”
Për të hedhur nga një shtresë asfalt në këto 3 rrugica në fshatra Veliaj do të shpenzojë 2 milionë euro. Pra edhe mbledh votat e këtyre fshatrave edhe i kompanisë së mikut të tij një fond të madh.
Bashkia e njoftuar “garën” më 29 gusht 2024 dhe priste aplikimet deri më 13 shtator 2024. Gjatë kësaj periudhe shfaqen interes për të marrë pjesë në garë 18 kompani. Shumica prej tyre janë gjithashtu përfituese të favoreve të Veliajt dhe paraqiten në tender vetëm për formalitet, sepse fituesi dihet qysh më parë.
Ndërkohë menjëherë në fazën e parë Veliaj ka përdorur metodën e zakonshme, “skualifikim i të gjithë operatorëve përveç fituesit”.
Komisioni i vlerësimit të ofertave skualifikoi 17 nga 18 ofertat.
Vetëm për 7 oferta janë sqaruar arsyet e skualifikimit, pasi kishin edhe ofertë më të ulët se fituesi, por për të tjerat nuk është dhënë asnjë argument.
Në këto kushte u kuptua që firma e përzgjedhur ishte BE-IS SHPK, në pronësi të Hamza Islamajt. Oferta e tij ishte e vetmja që kaloi për në fazën finale dhe duke qenë se nuk kishte konkurrencë, u shpall menjëherë fituese. Open Data Albania i ka vënë tenderit “Flamurin e Kuq|, që është shenja e riskut të korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
Discussion about this post