Kryetari i KQZ-së, Ilirjan Celibashi, ka folur për financimin e paligjshëm të partive në komisionin e Posaçëm të Dezinformimit.
Celibashi pranoi se KQZ nuk i ka mekanizmat për t’i kontrolluar burimet e parave.
“Nuk ka paraqitur asnjë pretendim në lidhje me financime nga vende keqdashëse sepse nëse ka qenë ky rasti natyrisht të gjithë e dinë që jemi në shkelje thelbësore të legjislacionit dhe çdokush që i ka marrë këto financime ka treguar kujdesin që të mos bëhen publike. KQZ e ka shumë të vështirë të marrë informacion. I vetmi informacion është të pyesësh subjekte por nuk ka mekanizëm që të vërtetosh nëse pohimi është i vërtetë.
Institucionet penale po merren me çështje të tilla. A duhet të merret KQZ-ja me raste të tilla. Nuk di ta them, jam në dilemë e shoh të papërshtatshme, mendoj anoj nga jo por KQZ mund të ketë mundësi të identifikojë indicie dhe t’i prezantojë te institucionet përgjegjëse” , tha Celibashi.
Sipas Celibashit, duhet ndryshim i Kodit Zgjedhor dhe ligjit për partitë që t’i jepet mundësia e verifikimit të financimeve të paligjshme për partitë dhe më pas t’i adresojë ato në organet kompetente.
Komisoni i Posaçëm i Dezinformimit i drejtuar nga Erion Braçe u zhvillua ashtu si shumë komisione të tjera pa praninë e opozitës.
Discussion about this post