Ish-ministri i Mjedisit Lefter Koka, në seancën gjyqësore të zhvilluar këtë të premte, i ka kërkuar pafajësi Gjykatës së Apelit të Posaçme për akuzat e ngritura ndaj tij në dosjen e inceneratorit të Elbasanit. Nga kafazi i sallës së gjyqit, ai ka pretenduar se “peshku i madh” ishte dikush tjetër.
Ish-ministri Lefter Koka është dënuar nga GJKKO me 5 vjet e 8 muaj burg për çështjen e inceneratorit të Elbasanit. Po ashtu, është dënuar edhe me 6.8 vite heqje lirie për atë të Fierit. Në seancën që po zhvillohet sot në Gjykatën e Posaçme, Koka ka thënë në sallën e gjyqit se është i pafajshëm. Ai ka kërkuar llogari edhe për ndarjen e çështjeve të inceneratorit, duke pretenduar se qëllimi i togave të zeza është që ai të dënohet sa më shumë.
“Jam i pafajshëm, ju po kërkoni të më dënoni mua si peshkun e madh, por nuk jam unë peshku i madh. E di i gjithë Durrësi që unë jam biznesmen dhe nuk kam pasur nevojë të më paguajë biletat e udhëtimit Mirel Mërtiri. Nuk më dënoni dot për korrupsion. Avokatët e tij thanë që biletat e rezervuara janë 3 vjet më vonë sesa lidhja e kontratës. Prokurorët pse nuk marrin si referencë kontratat e tjera për landfille si ai i Vlorës dhe Lezhës që janë më të shtrenjta?
E keni gabim, dëgjova prokurorin sot… Ky është fiks kallëzimi i bërë nga Monika Kryemadhi. Megjithëse ka kaluar një vit, konkluzionet e prokurorëve janë të njëjta. Unë e kuptoj që institucioni do të marrë kredibilitet dhe kjo gjykatë do të jetë nën presion, por besoj se do të jepni drejtësi dhe do të ngriheni në nivelin e duhur. Pse e ndatë dosjen apo që të më denoni sa më shumë mua?!”, mësohet të ketë thënë ish-ministri para togave të zeza.
SPAK ka apeluar vendimin e shkallës së parë të GJKKO-së në Apelin e Posaçëm për ish deputetin socialist Alqi Bllako dhe ish ministrin e Mjedisit Lefter Koka, për inceneratorin e Elbasanit. Më herët GJKKO vendosi të shpallë të pafajshëm ish deputetin Ballko për inceneratorin e Elbasanit, vendim që është kundërshtuar nga SPAK, i cili kërkon që të dënohet me 4 vite burg. Aktualisht Bllako po vuan dënimin vetëm për inceneratoritn e Fierit për “shpërdorim detyre” me 2 vite e 8 muaj heqje lirie. Gjithashtu SPAK kërkon që edhe për ish ministrin Koka t’i shtohet edhe akuza e “shpërdorimit të detyrës”. Në tetor të 2023 GJKKO dënoi ish-ministrin Koka me 5 vjet e 8 muaj burg për korrupsion, ndërsa rrëzoi akuzën e “shpërdorimit të detyrës” për inceneratorin e Elbasanit.
Seanca e sotme u shty pa një vendim lidhur me miratimin ose jo të kërkesës së prokurorisë.
Discussion about this post