Bashkia e Fierit ka dhënë një tender për ndërmarrjen e Pastrim Gjelbërimit, ku ka përcaktuar një fond që do të shpenzohet për blerje kontenierësh. Fondi limit për blerjen e kontenierëve, që siç përcaktohet në kontratë do të jenë në funksionin e koshave të mbeturinave me përmasa 1.1 m3, është 10 800 000,00 lekë të reja ose rreth 108 milionë lekë të vjetra. Ajo që bie në sy është procedura e ndjekur për shpalljen e operatorit fitues, që është në shkelje të plotë me rregullat e ligjit të konkurrencës. I cilësuar si tender me “red flag”, të gjithë operatorët pjesmarrëse janë skualifikuar automatikisht nga gara, përjashtuar kompaninë fituese.
Në dokumentin e publikuar thuhet se operatori i përjashtuar nuk ka dorëzuar asnjë dokument kualifikues si dhe nuk ka paraqitur ofertën për garën e tenderit. Në garën për këtë tender kanë marrë pjesë vetëm dy operatorë, ai fitues dhe kompania “N.N.Z.K. Shkodra” SHPK, e cila nuk ka paraqitur ofertë. Këto të dhëna ngrenë dyshime si fituesi i tenderit me numër reference 12599-11-23-2021, mund të jetë i paracaktuar dhe pjesëmarrja e një operatori që nuk paraqet dokumentet e kërkuara në garë mund të jetë bërë vetëm për procedurë, pra pjesëmarrje fiktive.
Ky tender prej më shumë se 108 milionë lekësh që do të shërbejë për blerje koshash mbeturinash nga kompania fituese që është “LEKA – 2007” SHPK, parashikohet të konsumojë para të taksapaguesve jo vetëm për buxhetin e vitit 2021 por edhe për atë të vitit pasardhës, 2022. Financimi do të bëhet në 2 (dy) vite buxhetore (2021, 2022), përkatësisht në shumat 4 100 000 lekë me TVSH për vitin 2021 dhe 8 860 000 lekë me TVSH per vitin 2022, saktësohet në dokumentin e publikuar.
Discussion about this post