Rikthimi i anijes me mbetje toksike në Portin e Durrësit, qytetarët në protestë

Anija “Moliva” që dyshohet se përmban mbetje të rrezikshme, pritet të hyjë në radë në portin e Durrësit mëngjesin e së hënës.

Referuar burimeve nga Dogana, mësohet se kjo është e vetmja anije që transporton mbi 200 kontenierë dhe është e vetmja që vjen në port.

Ndërkohë gjatë ditës së sotme, përfaqësues të PD dhe shoqërisë civile, po protestojnë në hyrjen para portit.

Ata kanë shpalosur një pankartë ku shkruhet “ Mbetjet janë të rrezikshme, qeveria toksike”.

Nënkryetari i PD-së, Oert Bylykbashi është shprehur se prokuroria duhet të ishte këtu për të sekuestruar kontinierët.

Ai thotë se kjo është një skemë krimi gjigande dhe ky port është përbashkues i interesave të politikës dhe krimit.

“Mbetjet toksike po vijnë në Portin e Durrësit dhe e bëmë këtë protestë për të caktuar qartë qëndrimin jo vetmë të PD por edhe të qytetarëtve të Durrësit dhe Shqipërisë që janë kundër këtyre mbetjeve.

Kjo është një skemë krimi gjigande dhe ky port është përbashkues i interesave të politikës dhe krimit. Porti është grabitur për të ja dhënë mikut të Ramës dhe kur ndodh kjo asgjë nuk mund ta pengojë kalimin e mbetjeve toksike.

Këto mbetje u pikasën nga Rrjeti i Baselit dhe zbuluan skandalin duke i bllokuar në një vend tjetër dhe po i kthejnë pas për të helmuar shëndetin e qytetarëve të Shqipërisë.

Ajo që na shqetëson ne përveç mungesës së transparencës është shëndeti dhe rreziku i saj nga këto mbetje toksike. Ky është prokuroria që duhet të jetë këtu e gatshme për të sekuestruar kontinerët dhe të arrestojë personat që janë përfshirë drejtpërdrejtë këtu deri te ministrat.”

Ambientalisti Sazan Guri ka bërë thirrje që të kryhen analiza për mbetjet toksike që do të ankorohen në Portin e Durrësit këtë të dielë.

Ai ngre dyshime, nëse ato janë mbetje, pasi mund të jenë edhe mbetje radioactive shumë të rrezikshme.

“Kërkojmë që këto plehra para shkarkimit të bëhet analiza e tyre, të dimë ku t’i varrosim. Mirëpresim laborator ndërkombëtar për analizat e mbetjeve, që të dimë t’i pranojmë ose jo. S’duhet t’i pranojmë, kur nuk e dinë se çfarë janë. Dyshimi është se janë lëndë radioaktive, apo shumë e rrezikshme. S’kemi asnjë landfill që të presin mbetje familjare, e jo mbetje të tilla”, u shpreh ai.

Rreth 2100 tonelata mbetjesh industrial pritet të mbërrijnë në Shqipëri mbrëmjen e së hënës.

Mbetjet dyshohet se përmbajnë lëndë të dëmshme helmuese, të paketuara në 102 kontejnerë, shkruan organizata joqeveritare amerikane Rrjeti i Aksionit të Bazelit.

Mbetjet, që dyshohet se janë të rrezikshme, kanë krijuar debate të shumta.