Kryeministri i Kosovës, Albin Kurti tha se nuk është ai personi që e formon Asociacionin, or u zotua se nuk do të nënshkruajë asnjë tekst që vjen pa u dorëzuar Milan Radoiçiçi.
“Unë kam ofruar që të shkruaj draft-statutin e Asociacionit, por aty jam refuzuar, pasi më është thënë se atë duhet të bëjnë ekipi-menaxhues. Ai ekip e shkroi diçka që ishte më keq sesa Republika Srbska në Bosnje”, tha Kurti në një konferencë për mediat.
“Nuk e formon kryeministri Asociacionin, por komunat. Nëse Asociacioni imponohet nga lart e nga larg, ai nuk është Asociacion. Kam ofruar të nënshkruaj draft-statutin për Asociacionin disa herë, por nuk e pranuan. Kërkoj të nënshkruaj marrëveshjen bazike. Pa e dorëzuar Radoiçiçin dhe pa e tërhequr letrën e Bërnabiçit, nuk e di çfarë draft-statutesh mund të shkruajë dikush, jo unë, por dikush tjetër. Mos e nxirrni qerren para kuajve”.
Asociacioni, një strukturë e parashikuar në Marrëveshjen e Brukselit të vitit 2013, synon të japë një nivel të caktuar autonomie për komunat me shumicë serbe. Megjithatë, Kosova heziton të themelojë Asociacionin nën presion të drejtpërdrejtë ose pa garanci për integritetin territorial, duke insistuar që ky proces të udhëhiqet nga brenda, në përputhje me Kushtetutën e Kosovës. Serbia, nga ana e saj, shpesh e kushtëzon progresin në dialog me themelimin e këtij Asociacioni sipas kërkesave të saj.
Pengesa kryesore mbetet mosmarrëveshja mbi draft-statutin dhe mënyrën e themelimit, pasi Kosova kërkon që Asociacioni të ketë rol administrativ pa kompetenca ekzekutive që mund të cenojnë integritetin e saj shtetëror. Përpjekjet për kompromis kanë qenë të vështira, dhe së fundmi Bashkimi Evropian ka shtuar presionin ndaj të dyja palëve për zbatimin e marrëveshjeve të nënshkruara. Ndërkohë, tensionet në veri dhe ndikimi i vazhdueshëm i Serbisë në çështjet e komunitetit serb të Kosovës kanë përkeqësuar klimën e dialogut, duke e bërë të vështirë gjetjen e një zgjidhjeje të pranueshme për të dyja palët.
Discussion about this post