Të shtëna me armë zjarri janë shënuar pasditen e kësaj së mërkure në Shkodër. Sipas burimeve ende të pakonfirmuara zyrtarisht nga policia, dyshohet për dy të vrarë. Ngjarja ka ndodhur në afërsi të rrethrrotullimit të “5 Heronjve”, në zonën e Dobraçit.
Referuar burimeve policore, një nga dy viktimat udhëtonin me një automjet tip “Benz S Class”, kur ndaj këtij mjeti është qëlluar me armë zjarri. Dyshohet se është qëlluar nga dy makina të tjera, që janë larguar pas të shtënave. Ndërsa viktima tjetër është nga një çift bashkëshortësh, dyshohet se lëviznin me një motoçikletë kur kanë ndodhur të shtënat dhe nuk kanë qenë ata objektiv i atentatit, por personat në mjetin tip “Benz”.
Dy objektivat, sipas burimeve policore, janë Hamza Lici dhe Arlind Bushati. Hamza Lici është vëllai i Ibrahim Licit, i shpallur në kërkim për vrasje. Fisi Lici njihet për armiqësinë me fisin Bajri në Shkodër.
Ndërsa Arlind Bushati, 32 vjeç, është djali i Xhemal Bushatit, kandidatit të PD (grupit Basha) në zgjedhjet lokale në Shkodër në vitin 2023. Disa ditë më parë, Arlind Bushati kallëzoi në polici se ishte kërcënuar me armë zjarri nga dy persona.
Për nga mënyra e kryerjes së vrasjes, mendohet se kemi të bëjmë me një atentat të organizuar.
Përveç policisë, në vendin e ngjarjes kanë shkuar edhe disa autoambulanca.
Discussion about this post