Vlora përmbytet, drejtori i Ballukut shpenzon 250 MLN lekë për matësa, tenderi pa garë

Vlora përmbytet nga shirat, por kjo situatë akoma nuk e paska vënë në lëvizje Shoqërinë e Ujësjellës Kanalizimeve! Ministrja Belinda Balluku qysh kur e mori nën administrim Ujësjellësin e Vlorës (ka 51% të aksioneve) vuri drejtor Sokol Kananajn, ish-drejtorin e Tatimeve dhe pritej që të bënte ndonjë investim. Doli dielli dhe përmbytja u harrua! Shohim që shoqëria do të blejë 250 milionë lekë matësa për ujin.

Në vend që të merret me këto problematika, vartësi i Ballukut ka zhvilluar tender për të blerë matësa uji.

Më 3 shtator 2024 është shpallur njoftimi dhe është mbyllur procedura më 18 shtator2024, gjatë kësaj periudhe u dorëzuan 5 oferta. Po më 18 shtator 2024 është mbajtur tenderi, detajet ë të cilit do t’ua tregojmë më poshtë.

Tenderin ka si objekt “Blerje matësa uji” me fond limit 250 milionë lekë. Përveç se është një investim i pa vend, drejtori ka shkelur ligjin e prokurimeve.

Në 5 ofertat që janë paraqitur, komisioni ka skualifikuar të gjitha pa shkuar në fazën finale, përveç ofertës nga firma AZ Trading me vlerë 220 milionë lekë.

Nuk ishte oferta më e lirë, por ishte e vetmja që mbeti në fazën e fundit.

Katër kompanitë e tjera u skualifikuan me argumentin se nuk plotësojnë kriterin e kapacitetit financiar, që të kenë bërë më parë kontrata të ngjashme me vlerë minimumi 40% të fondit limit.

Ndërkohë pa garë fare, është firmosur menjëherë kontrata me firmën AZ Trading. Me këtë lloj tenderi fitoi oferta më e shtrenjtë! Duke qenë se nuk ka urgjencë, tenderi mund të anulohej dhe riformulohej, që të merreshin oferta më të përshtatshme. Kontrata u bë publike në Agjencinë e Prokurimeve Publike më 28 tetor 2024 dhe mund të anulohej edhe për arsye madhore, për shkak të përmbytjes, sepse duhet të kanalizohen në një drejtim tjetër paratë e shoqërisë.

Open Data Albania e ka vlerësuar tenderin me “Flamurin e Kuq”, që është shenja e riskut të korrupsionit.

Ndërkohë në dokumentet e tenderit përshkruhet se do të blihen 10, 300 matësa uji, pra 10,300 familje a biznese do të vihen përballë detyrimit të faturave për t’u pajisur me këtë aparat të ri.

Sikur këto 250 milionë lekë të investoheshin në rrjetin e kanalizimeve do të ishte më e dobishme. Edhe në rrjetin e ujësjellësit do të bënin më shumë efekt këto lekë, që të shtohen orët e furnizimit me ujë të qytetarëve.

Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.