Qeveria Greke ka ndërmarrë disa masa rregulluese të procedurave të pajisjes së emigrantëve me leje qëndrimi në vend. Njoftimin e bëri këtë të Martë ministria e Brendshme, që bëri me dije se ka dërguar qarkoret sqaruese për të gjitha zyrat e decentralizuara të vendit.
Ministria sqaron se vendimi i qeverisë greke parashikon shtyrjen e lejeve të qëndrimit deri në 31 mars 2022 për të gjitha lejet e qëndrimit që skadonin para kësaj date dhe mundësinë e aplikimit për rinovim të lejes, pa dalë leja e vjetër. Vendimi i ri rregullon problemet e së shkuarës, pasi ka pas mijëra raste që emigrantit i skadonte leja e qëndrimit, pa e marrë fare pasi zyrat e decentralizuara të prefekturave nuk arrinin ti shpërndanin në kohë ato.
Një tjetër ndryshim lidhet me njohjen tanimë nga të gjitha institucionet shtetërore dhe private të “vërtetimit blu”, ose i quajtur ndryshe rinovimi online.
Me këtë vërtetim, tashmë mundësohet kalimi lirisht në pikat kufitare mes dy vendeve. Lidhur me këtë vendim të qeverisë greke, eksperti i çështjeve migratore Fatos Malaj thotë se ndërhyrjet në legjistacion janë bërë për të zgjidhur disa vështirësi praktike për aplikimin ose marrjen e lejes që qëndrimit.
Ai sqaron se në bashkëpunim me ministrinë e Brendshme, po punohet edhe për një sërë ndryshimesh në drejtim të lehtësimit ose sqarimit të procedurave burokratike të dhënies së shtetësisë greke, siç janë heqja e provimit të dytë pasi aplikanti ka kaluar më parë testin, heqja e pengesave për të ardhurat e viteve të kaluara për ata që kaluan provimin e testit elektronik si dhe thjeshtësimin e pyetësorit, për të cilin ekspertët thonë se është një ndër provimet më të vështira në Europë.
Qeveria greke ka zgjedhur të aplikojë procedura strikte për çështjet migratore, nën shqetësimin e rritjes së emigracionit klandestin, ndërkohë që probleme janë hasur edhe me procedurat e punonjësve sezonalë, çka ka krijuar mungesë të madhe punonjësish në sektorët e bujqësisë, turizmit dhe ndërtimit.
Discussion about this post