Kosova e mbylli me fitore rrugëtimin e saj në grupin 2 të Ligës C, në Ligën e Kombeve. Dardanët triumfuan mbrëmjen e djeshme ndaj Lituanisë me rezultat minimal 1-0, ndeshje kjo e zhvilluar në stadiumin “Fadil Vokrri” në Prishtinë.
Goli që i siguroi tri pikë të plota Kosovës erdhi në minutën e pestë. Realizues ishte Muharrem Jashari .Pikërisht Jashari ishte ai i cili i la vendasit me një lojtar më pak në fushë pas u përjashtua me karton të kuq në minutat shtesë të pjesës së parë për shkak të një ndërhyrjeje të palejuar në mesfushë.
Kjo bëri që në pjesën e dytë lituanezët të ishin më të rrezikshëm duke kërcënuar disa herë portën e Arjanet Muric, madje arritën që të godisnin edhe shtyllën. Gjithsesi, deri në fund, rezultati mbeti i pandryshuar dhe Kosova mori tri pikë të plota.
Kështu, Kosova mbetet në vendin e dytë në këtë grup me 12 pikë, tri më pak se Rumania e vendit të parë dhe është në pritje të vendimit të UEFA-s për ndeshjen me rumunët pas incidentit të ndodhur tri ditë më parë në Bukuresht, ku takimi u ndërpre për shkak të fyerjeve nga tifozët vendas kundër Kosovës.
Discussion about this post