Një natë më parë një shtetas kosovar, i identifikuar me emrin Flamur, dyshohet se ka vrarë dy djemtë e tij të mitur, ka plagosur bashkëshorten e tij, si dhe është vetëvrarë. Fqinjët e familjes kosovare janë shprehur se banesa ku ndodhi ngjarja tragjike është e boshatisur dhe askush nuk gjendet në të, ndërsa tregojnë se kanë vendosur lule dhe qirinj në nder të viktimave.
“Në shtëpi për momentin nuk gjendet askush, policia e ka mbyllur shtëpinë si zonë të krimit dhe prokurorët po e kryejnë punën e tyre aty”, tha një banor.
Ndërkohë nëna e dy fëmijëve të ndjerë, përkatësish 11 dhe 13 vjeç, raportohet se ndodhet në gjendje koma në spital, ku po mbahet nën survejimin e bluzave të bardha. Gjendja e saj paraqitet e rëndë dhe aspak e qëndrueshme, ndërsa në shtëpi kanë mbetur ende gjurmët e jetës përpara kësaj tragjedie. Dekorimet e fundvitit gjenden ende aty, ndërsa lulet e fqinjëve nuk mungojnë.
Raportohet se familja kosovare kishte pasur situata konfliktuale dhe në vitin 2020, ndërsa ende nuk dihen shkaqet që kanë çuar në këtë tragjedi në familje me tre të vdekur dhe një të plagosur.
Discussion about this post