Fjala “akademi” është trendi në fjalorin politik shqiptar. Duket një nivel më i lartë se sa “kurset”. Politikanët duken si fëmijët që kanë mësuar një fjalë të re. Kështu, janë krijuar vitet e fundit akademi politike të atashuara tek partitë, akademi për barinjtë, për programime, për turizëm, për gjithçka që të shkon mendja.
Ndërsa autoshkollat e quajnë programin “kurs për mësimin e automjetit”, kryebashkiaku Erion Veliaj inauguroi Akademinë e Biçikletave. Për ata që nuk e dinë biçikletën, akademia ndodhet pranë stadiumit ‘Air Albania’. Dikur aty ishte një park ku pushonin të moshuarit e luanin fëmijët, madje kishim mundësi të mësonin biçikletën të ndihmuar nga të afërmit, ashtu sikur e kemi mësuar ne të gjithë.
Por Veliaj shpiku Akademinë e Çiklizmit, e cila deri më tani iu ka kushtuar qytetareve të Tiranës 900 milionë lekë. Ndërsa tani është hapur një tjetër tender për të derdhur para të tjera në këtë projekt, që shërben vetëm për të bërë foto Veliaj.
Red Flag
Edhe pse sikur thamë kjo akademi është hapur në qershor, pas 5 muajsh i është dëmtuar pjesa e tapetit poshtë. Veliaj nuk ka dhënë asnjë shpjegim për këtë, por menjëherë ka hapur garën për tenderin me objekt “F.V rinovimi i shtresës së tartanit në Akademinë e Çiklizmit” dhe për të rinovuar këtë shtresë do të shpenzohen 28 milionë lekë (me TVSH). Gara ka qëndruar e hapur deri më datë 5 nëntor 2024 dhe në të njëjtën ditë janë mbajtur procedurat.
Tenderi është thjesht një procedurë fiktive, sepse Veliaj e ka dhënë porosinë se kujt do t’i jepen këto lekë.
Nga 5 oferta të dorëzuara, komisioni i tij kaloi për në procesin e fundit vetëm ofertën e firmës ”ARTEO 2018”, në pronësi të Artan Topit. Kjo ishte oferta më e shtrenjtë, me vlerë sa fondi limit, çka ligjërisht nuk e bënte prioritare për fituese. Ndërkohë ofertat e tjera ishin në vlerë 18 milionë lekë ose 19 milionë lekë, por Veliaj i ka skualifikuar për “mungesë dokumentacionesh”.
Kontrata që i është dhuruar Topit, u bë publike më 19 nëntor 2024 në Agjencinë e Prokurimeve Publike. Ndërkohë ky tender është vlerësuar me “Flamurin e Kuq”, shenjë që tregon riskun e korrupsionit. Monitoruesi e përshkruan veprimin e Bashkisë Tiranë me fjalët “skualifikim i të gjithë operatorëve ekonomikë përveç fituesit”.
Shpenzimet pa kufi
Sakaq ju kujtojmë se në gusht të vitit 2021, Agjencia e Parqeve dhe Rekreacionit me urdhër nga Veliaj hapi tenderin me objekt Tirana Akademi e Çiklizmit (Ndërtim Montim)”. U dhanë pa garë 115 milionë lekë për montimin e pajisjeve.
Më datë 12 dhjetor 2022, kryebashkiaku ka firmosur dokumentet për ndërtimin e akademisë që kishte si objekt “Shkolla e biçikletave, për grupmoshat 7-10 vjeç”.
Është regjistruar edhe tenderi 32 milionë lekë për kolaudim punimesh. Pa mbushur mirë vitin kryerja e këtyre punimeve, i shtohen edhe 28 milionë lekë për përmirësime! Lali Eri duhet t’iu japë llogari fëmijëve të kryeqytetit, përse i shpërdoron lekët në emrin e tyre.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post