PL: Buxheti 2025 thellon varfërinë, do paraqesim amendamente

Zëvendëspresidentja e Partisë së Lirisë, Erisa Xhixho deklaroi sot se buxheti i vitit 2025 thellon më tej varfërinë e shqiptarëve.

“Mënyra si qeveria ka vendosur t’i shpërndajë fondet është prova më e qartë se barrën e korrupsionit të saj do ta mbajnë pensionistët dhe shtresat në nevojë”, deklaroi ajo.

Xhixho vuri në dukje se pjesa më e madhe e buxhetit 2025 shkon për punët publike.

Kjo sipas saj, jo rastësisht, pasi është zëri përmes së cilit mund të vidhen më lehtë paratë e shqiptarëve.

“Qeveria ka planifikuar që për vitin e ardhshëm, plot 777.2 miliardë lekë të shkojnë për projektet korruptive PPP.

Ndërkohë, nga ana tjetër, pensionistët u tallën me një indeksim 4.1%, që është jo më shumë se një panine në ditë”, deklaroi Xhixho.

Xhixhi shtoi se pensionistët, kategori që e ka votuar Partinë Socialiste, sot janë më të zhgënjyer se asnjëherë. Sepse, sipas saj, me këtë buxhet, qeveria po i zhyt akoma më thellë në varfëri.

“Pensionistët shqiptarë janë më të varfrit në rajon me një pension mesatar 160 euro, ndërsa në Kosovë është 340 euro, në Malin e Zi është 450 euro, në Maqedoninë e Veriut është 325 euro dhe në Serbi është 390 euro”, deklaroi Xhixho.

Ky buxhet, vuri theksin ajo, nuk ka parashikuar asnjë lek për të mbështetur të papunët, ndërsa fondet për shtresat në nevojë ulen me 7.3%.

Ajo bëri të ditur se Partia e Lirisë do të propozojë amendime, në mënyrë që nga buxhet në shërbim të oligarkëve, të kthehet në buxhet në shërbim të qytetarëve.