Tenderët abuzivë për ndonjë shtresë asfalti sa për të gënjyer votuesit kanë nisur edhe në Bashkinë Mirditë. Përpara zgjedhjeve, kryetari Albert Mëlyshi i është futur tenderëve me kokë, duke favorizuar miqtë e tij.
Së fundmi është zhvilluar tenderi me objekt “Rikonstruksion i Rrugës fshati Jezull, njësia administrative Rrëshen, bashkia Mirditë”, me fond limit 250 milionë lekë.
Sipas informacioneve të tenderit, rruga është 1,523 metra e gjatë, por nuk ka nevojë për ndërhyrje të shumta, pasi është e gjerë dhe e niveluar mirë.
Madje në dokument nuk flitet as për trotuare dhe as për ndriçim, por vetëm për një shtresë çakëll dhe në fund asfaltin.
Në dokumentet e dorëzuara në Agjencinë e Prokurimeve Publike tregohet se kur u shpall “gara” ishin 5 kompani që dorëzuan ofertat e tyre. Nga këto veçojmë RSM COMPANY dhe BOE BAJRAMI N SHPK & ARDILEON-AUTOGRILL 1111 SHPK që kishin ofertat më ulëta, që menjëherë duheshin marrë në shqyrtim si pretendente për këtë prokurim.
Por Mëlyshi ka bërë të kundërtën, të dyja këto firma së bashku me dy oferta të tjera i ka skualifikuar në fazën e parë.
Sipas komisionit, këta operatorë ekonomikë kanë mangësi në disa dokumente të dorëzuara fizikisht dhe me këtë argument i shtruan rrugën për në fazën e fundit firmës “Kthella” SHPK, në pronësi të Pjetër Nikolli, që është edhe fituesja e këtij tenderi.
Open Data Albania i ka vendosur “Flamurin e Kuq” për të dhënë alarmin për riskun e korrupsionit në këtë tender. Urojmë që të hidhet asfalti në këtë rrugë, pasi kompania në fjalë shquhet për vonesa në dorëzimin e punëve publike sipas kontratave.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet .nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post