Pema e Krishtlindjes duhet të vendoset në datën 6 dhjetor dhe të hiqet në 6 janar. Kështu u shpreh teologu Miron Çako duke u dhënë përgjigje atyre që e kanë vendosur më herët apo nuk e kanë vendosur ende. Në një lidhje me emisionin “Dita Jonë” në “A2 CNN”, ai tha se pema nuk është simbolikë autentike e krishtlindjes, por një simbol pagan që ka ardhur në Evropë në shekullin 16 nga Martin Luteri. Sipas tij simboli i Krishtlindjes është grazhdi.
“Ne presim Krishtlindjen që është lindja e Krishtit dhe që është festë fetare me simbolikat e veta. Pema nuk është simbolikë autentike e krishtlindjes, është simbol pagan, i vjetër që ka ardhur në Evropë shekullin 16 nga Martin Luteri u vendos si simbol i krishtlindjes, u përhap në Evropë në SHBA e Australi. Kisha katolike e ka vendosur në 1982, dhe ka hyrë edhe tek ne. Nuk është kjo simbolika e Krishtlindja. Për ne të krishterët ka qenë improvizimi i vendi ku lindi Krishti në një grazhd. Simbolika e krishterë vendoset në mbrëmjen e 6 dhjetorit se ne ortodokset festojmë Shën Nikollën, i cili ishte shumë bujar dhe tradita ishte që në ditën e Shën Nikollit ndaheshin dhurata te fëmijët. Kisha na nxit; përgatitni Betlehemin, përgatitni grazhdin dhe të krishterët marrin indicie të arredojnë me simbolikat e krishtera, që është grazhdi, mund të vendosim edhe pemën por ne i vëmë shenjën e Krishtit që është kryqi”.
Teologu thekson gjithashtu se simbol për të krishterët në pemë është kryqi dhe jo ylli mes 5 cepa, që sipas tij është një simbol okult dhe satanist.
“Vendosja e pemës më herët nuk vjen nga ndjesia fetare, është padurimi për të arritur festën, por njeriu duhet të gëzojë me mendim, jo thjesht me instinkt apo konceptin materialist. Simbolika shpreh një doktrinë dhe çfarë kuptimi kanë simbolikat? Për krishtlindjen është grazhdi, mund të përdorim edhe pemë, por duhet të kenë shenjën e kryqit. Simboli i yllit me pesë cepa na kujton komunizmin ateizmin. Jo më kot komunizmi kishte marrë yllin si simbol të diellit, është simbol i diellit që okultizmi sot e shikon si njeriun perëndi ose të satanait. Është simbol okultist, satanist që mbajnë dhe grupet sataniste. Nuk ka lidhje me yllin e Betlehemit. Një yll është shenjë krishtlindje, por jo ylli me 5 cepa se është simbol okulist ose i lashtë kur njerëzit adhuronin diellin”.
Kremtimi i Krishtlindjes më datën 25 dhjetor për teologun është një datë e unifikuar që ka të bëjë me ngjarjen.
“Edhe krishtlindja që kremtohet më 25 dhjetor nuk është thjesht ditë kalendarike e lindjes së Krishtit. Ka pasur kalendarë të ndryshëm dhe për ti unifikuar të gjithë, kisha vendosi 25 dhjetorin për të festuar lindjen e Krishtit në shekullin e katërt. Krishti quhet dielli mendor ose i drejtësisë. Njerëzit bien në paganizëm janë të prirur nga pema, dritat të cilat janë reminishencë e paganizmit, ateizmit dhe komunizmit që e quajti pemën e vitit të ri”.
Ai thotë Krishtlindja është kthyer në një festë komerciale që është në antitezë me Krishtin. Dhurata duhet të shpërndahen në ditën e vendosjes së pemës, ndërsa të krishterët mbajnë 40 ditë kreshmë.
“Mendonin se pemët kishin fuqi mitike i shihnin si pjesë e zotave. Krishtlindja është bërë një nga festat komerciale shpenzime të kota që bien në antitezë me atë që ka ditën e lindjes. Krishti lindi në varfëri ekstreme Krishti thotë lum të varfrit se e tyre është mbretëria e qiejve. Dita 6 dhjetor ka qenë dita e ndarjes së dhuratave. Ne mbajmë kreshmë nga data 15 nëntor deri në 25 dhjetor dhe shkojmë e rrëfejmë mëkatet tona dhe kjo është dhurata që i japim Krishtit dhe kjo na bashkon me Zotit. Tradita është që fillon në 6 dhjetor dhe mbaron në 6 janar me ditën e ujit të bekuar. Njerëzit duhet të dinë përmbajtjen”.
Discussion about this post