Një vit pas ekstradimit të tij nga Maroku, Prokuroria e Lezhës ka mbyllur hetimet dhe ka marrë të pandehur portugezin Ruben Saraiva, i vënë nën akuzë për vrasjen e biznesmenit Ardian Nikulaj në Shëngjin.
Nën masa të rrepta sigurie, 29-vjeçari u paraqit këtë të premte në Prokurori, ku ju komunikua akuza e “vrasjes për gjakmarrje”, e kryer në bashkëpunim dhe “armëmbajtja pa leje”.
Pasi pala mbrojtëse të njihet me aktet, dosja hetimore do të dërgohet për gjykim në Gjykatën e Lezhës, e veçuar nga 5 personat e tjerë të vënë nën akuzë për këtë ngjarje, pasi organet e drejtësisë janë më pritje të ekstradimit të tyre nga Britania e Madhe.
I bindur se klienti i tij, nuk ka lidhje me vrasjen, avokati i portugezit, Kujtim Cakrani, thotë se do ta vijojnë betejën ligjore në gjykatë.
Ai po qëndron në paraburgimin e Tiranës, në pritje për t’u përballur me drejtësinë shqiptare, ndërsa deri ne vazhdimësi ka mohuar të ketë lidhje me vrasjen e biznesmenit Ardian Nikulaj, ngjarje e ndodhur ne muajin 19 prill të vitit 2023, në lokalin në pronësi të viktimës, në Shëngjin.
Dosja penale tashmë pritet të dërgohet për gjykim në Gjykatën e Lezhës, e veçuar nga 5 të akuzuarit e tjerë, mes të cilëve 4 shtetas anglezë, të cilët nuk janë ekstraduar ende nga Britania e Madhe. Më 27 Gusht gjykata britanike vendosi ekstradimin e 3 nga 4 prej anglezëve.
Shqiptari Edmond Haxhia, po i arrestuar atje, gjithashtu ndodhet në proces ekstradimi. Ai dyshohet si porositësi i krimit për motive gjakmarrjeje, në emër të kushërinjve të tij, familjes Lekstakaj.
Krimi dyshohet se është kryer me motive gjakmarrjeje, kurse i dyshuari si killer, portugezi Saraiva, nuk e ka pranuar akuzën e vrasjes.
Më 1 Nëntor portugezi kërkoi lirimin për mungesë provash, por u refuzua dhe mbeti në paraburgim. Më 2 Janar të këtij viti portugezi Ruben Saraiva doli në Gjykatën e Lezhës për masë sigurie pas arrestimit dhe ekstradimit më 31 Dhjetor 2023 nga Maroku, teksa mori “arrest me burg”, masë në të cilën dhe ndodhet aktualisht.
Discussion about this post