Dëbora në Shkodër, probleme me qarkullimin e mjeteve

Reshjet e dëborës kanë krijuar probleme në qarkullimin e mjeteve në disa akse në Qarkun e Shkodrës.

Sipas policisë, akset me probleme në qarkullim janë Tamarë – Selcë – Vermosh; Bogë – Qafë Thorë – Theth; dhe Pukë – Fushë Arëz – Qafë Mali, ku ka prezencë të dëborës, pasi reshjet po vijojnë pa ndërprerje.

Njoftohet se borëpastrueset janë në terren dhe vijojnë punën për pastrimin e rrugëve nga bora dhe për shpërndarjen e kripës.

Ndërkaq, nuk kanë munguar rastet kur shoferët kanë mbetur të bllokuar.

“Shërbimet e Policisë Rrugore në bashkëpunim me borëpastrueset i kanë shkuar në ndihmë një drejtuesi mjeti nga Saranda i cili kishte mbetur i bllokuar në aksin rrugor Theth-Bogë, dhe kishte kërkuar ndihmë te 112, pasi duke qarkulluar me goma verore e kishte të pamundur të vijonte lëvizjen”, thotë policia.

Policia Rrugore apelon “për drejtuesit e mjeteve që të bëjnë kujdes në lëvizje, të respektojnë sinjalistikën rrugore, të reduktojnë shpejtësinë, të pajisen me zinxhirë dhe goma dimërore dhe të ndjekin udhëzimet e shërbimeve  të Policisë Rrugore. Në rast nevoje për ndihmë, telefononi në numrin 112”.