Mediat italiane i janë rikthyer sërish rastit të vajzës shqiptare, Sonilës, e cila më 21 mars të vitit 2021, u gjet e varur në banesë, aty ku jetonte së bashku me partnerin e saj dhe djalin e vogël vetëm 2 vjeç. Ngjarja ndodhi në një apartament të vogël në Torino.
Fillimisht rasti u cilësua si vetëvrasje, por më pas prokuroria nisi ta hetonte më gjerë rastin pasi pati dyshimi, sepse sipas tyre, vajza ishte detyruar nga partneri i saj të prostituonte.
Në një operacion të fundit të policisë 3 persona janë vënë në pranga, ndërsa dy të tjerëve iu është dhënë urdhër që të largohen nga Italia. Ata akuzohen për krime të ndryshme, nga grabitjet e deri te prostitucioni. Për këtë rast janë nën hetim 16 persona, përfshirë edhe partnerin e 21-vjeçares së ndjerë.
Sipas një shkrimit të gazetës italiane “La Stampa”, ka qenë partneri i saj që e ka gjetur trupin e pajetë. Ndërkohë, në dëshminë e parë ai tha para hetuesve se gruaja e tij ishte vetëvrarë teksa ai ishte në lokal. Megjithatë, gjithçka ndryshoi një muaj më pas, kur ai ndryshoi versionin e tij të ngjarjes duke thënë se Sonila ishte vrarë, pasi sipas tij, ndoshta dikush dyshonte si ajo mund të ishte spiune e policisë. Ai tha se nga shtëpia ishin zhdukur edhe 17 mijë euro, ndërsa celulari i vajzës nuk u gjet kurrë. Sipas hetuesve, bashkëshorti i Sonilës nuk është i besueshëm, por në të njëjtën kohë nuk ka prova të mjaftueshme për të vërtetuar se ishte ai që e detyroi atë të kryente vetëvrasje, edhe nëse ai mbetet nën hetim për atë krim dhe për shfrytëzim prostitucioni.
Operacioni i policisë “Mariposa” çoi në shkatërrimin e rrjetit dhe nisi në maj të vitit 2022 nga një grabitje ndaj një prostitute shqiptare. Dy vëllezër dhe një prostitutë kishin grabitur dhe rrahur një grua tjetër që në sytë e tyre ishte fajtore se punonte në zonën e tyre. Kështu, hetimet zbuluan një sistem kriminal që përfshinte gra të reja të detyruara të prostitucionin në zonat periferike të qytetit si Barriera Nizza dhe Madonna di Campagna.
Discussion about this post