Sekretari i Financës dhe Ekonomisë në Partinë e Lirisë, Petraq Milo dhe Sekretari i Përgjithshëm i kësaj partie, Tedi Blushi në konferencë me gazetarët kanë prezantuar 16 amendamentet e kësaj force politike për buxhetin 2025 të bashkisë Tiranë.
Sipas Blushit, PL ka gati amendamentet për ulje tarifash dhe shtim fondesh për shtresat në nevojë.
“Së bashku me përfaqësues të grupit të këshilltarëve të Partisë së Lirisë në bashkinë e Tiranës do të denoncojmë jo vetëm projektbuxhetin 2025 të bashkisë së Tiranës, si thellësisht antisocial, korruptiv dhe zhvatës të taksave të qytetarëve, por edhe do të publikojmë 16 amendamentet e Partisë së Lirisë për uljen e një sërë taksash, si dhe shtim të fondeve për kategoritë sociale më nevojë, që arbitrarisht u janë mohuar nga Erion Veliaj, pasi interesi i tij nuk është të lehtësojë xhepat e qytetarëve dhe koston e lartë të jetesës, por është të shtojë vjedhjen përmes inceneratorit fantazmë të Tiranës, ku ai është pronari faktik i saj”, u shpreh Blushi në fjalën e tij.
Sipas PL, “shpërndarja e burimeve financiare është një tregues që për bashkinë Tiranë, prioritet mbeten zhvatja e taksave të qytetarëve nëpërmjet rritjes së shpenzimeve të personelit, të administratës, shërbimet policore, menaxhimi i mbetjeve dhe inceneratori i Tiranës”.
Disa nga amendamentet e Partisë së Lirisë për buxhetin e bashkisë së Tiranës janë: Anulimi i shpenzimeve për inceneratorin e Tiranës në vlerën 1.18 miliardë lekë; Ulja e shpenzimeve operative në 20% me një efekt 1.97 miliardë lekë; Ulja e shpenzimeve për investime në 20% me një efekt kursimi në 2.9 miliardë; Përgjysmimi i shpenzimeve të Kopshtit Zoologjik dhe dekoreve me një efekt kursimi në 0.2 miliard lekë, etj.
Discussion about this post