Disa prej pasurive të Alket Hatisë, i njohur edhe si “Zotëria e Drogës”, një epitet të cilin e ka marrë nga mediat në Itali, janë konfiskuar.
Policia e Durrësit njoftoi këtë të mërkurë se në bashkëpunim me Agjencinë e Administrimit të Pronave të Konfiskuara dhe Sekuestruara ka ekzekutuar vendimin e GJKKO për konfiskimin e disa pasurive të paluajtshme të cilat Hatija i kishte regjistruar në emër të vet dhe të familjarëve të tij.
Pasuritë që kalojnë në pronësi të shtetit janë 1 sipërfaqe toke truall, 1 garazh dhe 1 apartament në Durrës, si dhe 1 apartament në Kavajë.
“Shtetasi Alket Hatija, gjatë periudhës 2003-2004, ka kryer veprimtaritë kriminale të mbajtjes, shitjes dhe trafikimit të lëndës narkotike heroinë, nga Shqipëria në Itali. Ai ka trafikuar nga Shqipëria në Itali, me bashkëpunëtorët e tij, nëpërmjet automjeteve të transportit ndërkombëtar, sasi të mëdha droge (rreth 10 kg heroinë për çdo rast)”, njoftoi policia.
“Zotëria i Drogës”
Emri i Alket Hatisë u kthye në çështje gati 7 vite më parë, teksa mediat italiane njoftonin arrestimin e tij në Shqipëri duke e pagëzuar si “Zotëria i drogës”.
Sipas autoritete italiane, vetëm gjatë viteve 2003-2004, ai ka arritur të trafikojë në Milano 350 kg heroinë e 190 kg kokainë me vlerë rreth 40 milionë euro.
Për herë të parë, Hatija u arrestua në Shqipëri në vitin 2008 me kërkesë të autoriteteve italiane. Dosja u transferua në Shqipëri ku Gjykata e Krimeve të Rënda e dënoi Hatinë me 10 vjet e 8 muaj burg në vitin 2010, duke konvertuar dënimin e autoriteteve gjyqësore italiane.
Ai rifitoi lirinë në 23 dhjetor 2014 pasi përfundoi vuajtjen e dënimit të dhënë në Shqipëri, për të njëjtin aktivitet kriminal për të cilin ishte dënuar nga gjykatat italiane me 20 vjet burgim.
Më pas, Hatija u arrestua sërish në 2017-ën, po me kërkesë të autoritete italiane me qëllim ekstradimi. Disa muaj më vonë, Gjykata e Durrësit refuzoi ekstradimin dhe i hoqi masën “arrest në burg”, vendim që u la në fuqi edhe nga Apeli.
Liri i tij solli polemika, teksa mbrojtja argumentoi se shpallja në kërkim e Hatijsë lidhej me dënimin e dhënë vite më parë nga drejtësisë italiane dhe që ishte kryer tashmë nga “Zoti i Drogës” në Shqipëri.
Megjithatë, në vijim, Gjykata e Lartë e riktheu edhe njëherë në Shkallë të Parë çështjen, e cila kësaj here bashkë më Apelin pranuan ekstradimin. Por, Alket Hatija nuk u dorëzua. Nga arratia dhe përmes mbrojtësve të tij, çështjen e dërgoi në Gjykatën Kushtetuese, e cila i dha përfundimisht fund kalvarit gjyqësor më 31 janar 2022, duke lënë në fuqi ekstradimin e tij përfundimtar drejt Milanos.
Arrestimi me qëllim ekstradimin u krye në gusht 2023 dhe më pas ai u ekstradua drejt shtetit italian. Megjithatë, gjykatat atje i rikthyen lirinë. Sipas raportimeve meditike, me një vendim më 18 2023, Apeli i Milanos pranoi kërkesën e mbrojtjes duke konstatuar se Hatija e kishte shlyer në Shqipëri dënimin me burg të dhëna nga autoritetet gjyqësore italiane.
Discussion about this post