Website i qytetit të Magdeburgut ka publikuar shifrat më të fundit të viktimave dhe të plagosurve nga ngjarja që ndodhi në tregun e Krishtlindjeve, ku një makinë me shpejtësi mori përpara turmën.
Sipas njoftimit të përditësuar rezulton se aktualisht janë dy viktima të konfirmuara dhe 15 persona “të plagosur rëndë“. 37 persona të tjerë janë lënduar në masë të moderuar dhe 16 janë plagosur lehtë.
Aktualisht janë në aksion në Magdeburg 100 zjarrfikës me tre brigada profesionale dhe katër brigada vullnetare.
Ndërkohë, kryeministri i shtetit Saksoni-Anhalt, Dr Reiner Haseloff ka thënë në një dalje për mediat se një nga dy të vrarët ishte një fëmijë i vogël.
“Kjo është një nga gjërat më të tmerrshme që mund të imagjinohet. Kjo është një gjë e rëndë dhe e tmerrshme. Aktualisht jemi në proces të mbledhjes së të gjitha provave të mëtejshme dhe marrjes në pyetje. Sipas informacioneve aktuale, ky është një autor individual, kështu që nuk ka më asnjë rrezik për qytetin, sepse ne arritëm ta arrestonim atë”, tha Hasselhoff.
Dr Haseloff thotë gjithashtu se i dyshuari, i cili është nga Arabia Saudite, “po punonte si mjek në këtë shtet dhe kishte arritur në Gjermani në vitin 2006”.
Spitali Universitar i Magdeburgut ka sqaruar se “po kujdeset për 10 deri në 20 pacientë“, por po përgatitet për më shumë të plagosur që mund të dërgohen aty.
Personat e plagosur u panë duke u marrë me barela në dhjetëra ambulanca pasi makina u përplas me vizitorët në tregun e Krishtlindjeve sonte.
Zëdhënësi i qeverisë rajonale Matthias Schuppe dhe zëdhënësi i qytetit Michael Reif kanë thënë se dyshonin se kemi të bëjmë me një sulm të qëllimshëm.
Sipas “Mitteldeutsche Zeitung”, agresori i arrestuar banon në Bernburg (Bernburg Saale). Sipas informacioneve të gazetës, aty në orët e mbrëmjes është zhvilluar një operacion policor, ku Forcat Speciale thuhet se bastisën një shtëpi në Christianstrasse. Sipas Bild, policia nuk e ka konfirmuar nëse operacioni ka apo jo lidhje me sulmin në Magdeburg.
Discussion about this post