Berisha-të rinjve: Ju keni rol vendimtar në fitoren e zgjedhjeve të 11 majit!

Ka vijuar dita e dytë e trajnimit dy-ditor për Forumin Rinor të Partisë Demokratike të Shqipërisë që zhvillohet në bashkëpunim me ekspertët më të njohur të fushatave zgjedhore nga Shtetet e Bashkuara të Amerikës dhe Britania e Madhe: Ron Nehring, Peter Smallëood dhe John Fluharty, të cilët janë pjesë e ‘Leadership Institute. Në trajnim ishte i pranishëm edhe kryetari i Partisë Demokratike, Sali Berisha, ku gjatë fjalës së tij theksoi rëndësinë e lidershipit dhe bashkëpunimit për të arritur suksesin, veçanërisht në kuadër të trajnimit të të rinjve për t’u bërë liderë të ardhshëm.

Berisha tha se, një lider nuk duhet të ketë frikë, pasi frika është armiku më i keq për njeriun.

Kryedemokrati shtoi se bashkëpunimi është thelbësor për realizimin e vizioneve dhe projekteve dhe se një lider mund ta arrijë këtë vetëm duke krijuar dhe udhëhequr një ekip. Ai rekomandoi që një lider të fokusohet tek talente dhe aftësitë e anëtarëve të ekipit, duke injoruar dobësitë e tyre, për të arritur performanca të jashtëzakonshme dhe rezultate që duken të pamundshme.

Berisha theksoi se një kauzë e drejtë nuk duhet të braktiset kurrë, pavarësisht nga vështirësitë që mund të paraqiten.

Ai solli si shembull PD-në gjatë tre viteve të fundit, ku shumë gjëra që dukeshin të pamundura u bënë të mundura, dhe thekson se tani ka një tjetër “të pamundur” përpara, që është fitorja kundër narkoshtetit dhe fitorja e zgjedhjeve. Ai e konsideroi të jashtëzakonshme forcën morale të partisë në këtë betejë.

Kryetari i PD iu drejtua të rinjve dhe theksoi rolin e tyre vendimtar në fitoren e zgjedhjeve të 11 majit. Ai shpjegoi se, ndryshe nga dikur, nuk kanë përballë një diktaturë komuniste, por një narkodiktaturë, dhe se kjo betejë nuk është thjesht për një zgjedhje, por një mision që duhet realizuar.

Berisha beson fort se energjia, përkushtimi dhe imazhi i të rinjve janë thelbësore për suksesin e fushatës. Ai thekson se, nëse të rinjtë bëhen imazhi i kësaj fushate, kundërshtarët do të “shkatërrohen”. Berisha beson se, duke dominuar skenën dhe duke sjellë energji të rinjve, kundërshtarët nuk mund të krahasohen me ta.

Kreu i PD u bëri thirrje të rinjve të vazhdojnë betejën me besim të plotë në fitoren që i pret, duke iu referuar mësimeve dhe eksperiencave që ata kanë përfituar.