Agron Malaj hedh 360 MLN lekë për bojatisjen e Pallatit të Kulturës, tenderi me “Flamur të kuq”

Edhe bën gati ambientet për fushatën elektorale, edhe u ndan lekë miqve për Krishtlindje! Nuk i mbarojnë kurrë idetë për të gllabëruar fondet kryebashkiakut të Matit, Agron Malajt! Ndërkohë, me një tender, kryetari po siguron edhe reklamë për garën elektorale që po vjen. Më datë 12 nëntor 2024, Malaj shpalli të hapur garën për tenderin me objekt “Rivitalizimi i Sallës Qendrore të Pallatit të Kulturës “Shefqet Doda”, Rikonstruksioni i Galerisë “Tahir TAHIRAJ”, dhe Mobilimi i Bibliotekës “Pjetër Budi”, Bashkia Mat.

Siç shihet, në preventivin e tenderit, do të bëhen risovatime, lyerje të godinave, ndërsa për Bibliotekën do të blihen disa mobilje. Dhe me këto të dhëna kryetarit Malaj i del shpenzimi 360 milionë lekë.

Siç ndodh në këto raste, kur fituesi dihet qysh më parë, vetëm një ofertë është paraqitur, nga bashkimi i operatorëve “ASI INVEST” Sh.p.k – “DENOLT” Sh.p.k.

Ata propozojnë vlerën 355 milionë lekë, pra 5 milionë lekë më pak se fondi limit. Kjo shifër është sa 97.2% e fondit limit, çka tregon se tenderi nuk funksionon për qëllimin që organizohet.

Këtu nisi shkelja e parë, ndërsa është finalizuar me firmosjen e kontratës pa garë fare, pasi nuk kishte konkurrent të tjerë. Edhe në mënyrë specifike ligji kërkon që procedura duhet pezulluar kur konstatohet se pas përfundimit të afatit për ofertat nuk ka më shumë se dy konkurrentë.

Më datë 12 dhjetor 2024 është bërë e njohur kontrata, pas publikimit nga Agjencia e Prokurimeve Publike. Fituese është oferta e “ASI INVEST” Sh.p.k – “DENOLT” Sh.p.k dhe shpjegohet se “nuk ka asnjë kompani të skualifikuar, nuk ka ankesa”.

Open Data Albania i ka vendosur tenderit “Flamurin e kuq”, që është shenja e riskut të korrupsionit. Edhe nga analiza jonë e tenderit, rezulton se si pasojë e shkeljeve të bëra, që nisin nga llogaritja e fondit limit, deri tek shpallja e fituesit, ka risk të lartë për shpërdorimin e fondit.

Tani i mbetet APP, KPP dhe KLSH të evidentojnë zyrtarisht problemet e tenderit. Mbase edhe SPAK duhet të merret me kryetarin pasi e ka bërë rrugë abuzimin me tenderat.

Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.