Erion Veliaj ka konfirmuar largimin nga vendi “për dy ditë” dhe ka shpërthyer në sharje ndaj Sali Berishës, përmes një reagimi publik.
Mëngjesin e kësaj të Shtunës, në media u raportua se rreth orës 5:00 të mëngjesit, kryebashkiaku la vendin për të udhëtuar drejt Shteteve të Bashkuara.
Më vonë, kreu i PD Sali Berisha doli në një deklaratë për shtyp nga selia blu, nga ku aludoi për një arratisje të kryebashkiakut me urdhër të shefit të tij politik Edi Rama. “Erion Veliaj u përcoll pra jo vetëm për t’i shpëtuar dënimit, por për të fshehur krimet e Edi Ramës”, theksoi Berisha.
Në një reagim në faqen e tij në “Facebook”, Veliaj ka konfirmuar largimin e vendit, duke pretenduar se është nisur për në Shtetet e Bashkuara për shkak të takimeve të planifikuara më herët dhe shton se do të rikthehet në Shqipëri për dy ditë.
Gjithashtu, Veliaj shpërthen në sharje ndaj Berishës duke e etiketuar si “kërmë, fundërrinë e historisë, surratlig, gojëqelbur, burrë legen, pis burrë”, etj.
Veliaj lëshon dhe një mesazh ndaj SPAK-ut teksa shprehet se “unë e di radhën e punëve dhe tani e ka radhën prokurori special të bëjë çfarë të dojë, pastaj vjen radha ime për të thënë çfarë duhet”.
Në postimin në “FB”, Veliaj shkruan:
O Sali, o kërmë, që paske dhënë lajmin se jam arratisur nga Shqipëria, meqë ndonjë nga çimkat e tua më paska parë në avion. Po shkoj në Amerikë, për takime që i kam lënë prej kohësh, se jam kryetari i Bashkisë së Tiranës, dhe nuk jam Non Grata, o fundërrinë e historisë, që u bërë stërgjysh dhe sa më shumë zhubravitesh në atë surratin e lig, aq më shumë qelb Tiranën me gojën tënde.
Nuk iki unë nga Shqipëria, o kërmë, se kam ardhur nga Amerika kur isha 20 vjet më i ri, që të jepja një dorë për ta nxjerrë vendin tim nga llumi ku e zhyte ti me shokë! Dhe nuk më përkulin mua as letrat anonime, si në kohën e partisë, që të bëri ty persekutorin që je sot e gjithë ditën, as kushdo tjetër që shuan epshet e veta nëpër ekranet dhe rrugët e Tiranës, duke u marrë me familjen time, as fantazitë e sëmura të veshura me kostumet e karnavaleve të kësaj historisë sime në gjykatën e ekraneve dhe rrjeteve sociale.
Do të kthehem për dy ditë, dhe me durimin e paepur në pritje që të më vijë radha mua, se unë nuk jam burrë legen si ti, që kur SPAK-u merret me ty e me hajdutët e farës tënde është SKAPi i partisë, kurse kur merret me mua e me familjen time është SPAK-u i drejtësisë! Unë e di radhën e punëve dhe tani e ka radhën prokurori special të bëjë çfarë të dojë, pastaj vjen radha ime për të thënë çfarë duhet. Ashtu siç e di që unë jam mbështetës i drejtësisë së re dhe nuk bëj komente rrugëve kur ajo merret me të tjerët dhe pastaj rrugaç si puna jote, që të marr rrugët me akuza e sharje kur merret me mua. Aty rri se edhe ti s’ke nga lëviz, se je pa pashaportë dhe nuk del dot nga Shqipëria, se do të të dal si lugat në shtëpi natën e Vitit të Ri, kur edhe Syri i djalit tënd do jetë te Sheshi Skënderbej, duke transmetuar fishekzjarret e 2025-ës, kur do hash shqelmin më të fortë nga shqiptarët, sa të vijë maji!
Pis burrë!
Discussion about this post