Bashkimi Evropian paralajmëroi sot rrezikun e të ashtuquajturës “flotë hije” të Rusisë dhe u zotua të ndërmarrë veprime më të ashpra pas sabotimit të dyshuar të një kablloje elektrike nënujore në brigjet e Finlandës.
“BE do të ndërmarrë veprime më të rrepta për të kundërshtuar rreziqet që paraqesin këto anije”, tha shefja e politikës së jashtme, Kaja Kallas për gazetën “Die Welt”.
“Flota hije” e Rusisë kërcënon mjedisin dhe financon buxhetin e luftës së Rusisë”, tha Kallas, duke shtuar se anijet dyshohen se kryejnë akte sabotimi.
Kablloja e energjisë nënujore “Estlink 2” midis Estonisë dhe Finlandës u ndërpre të mërkurën – ndërsa autoritetet finlandeze dyshojnë se mund të ketë qenë një akt sabotimi.
Pas incidentit, ata ndaluan anijen-cisternë “Eagle S”me flamurin e ishujve Cook, spiranca e së cilës mendohet se ka dëmtuar kabllon.
Sipas BE-së, anija mund t’i përkasë të ashtuquajturës “flota hije” ruse – anije- cisternë dhe anije të tjera mallrash që Rusia përdor jozyrtarisht për të anashkaluar sanksionet ndaj transportit të naftës, për shembull.
Kallas, një ish-kryeministër i Estonisë, tha se sabotimi në Evropë ishte rritur që kur Rusia nisi luftën e saj kundër Ukrainës në shkurt 2022.
“Përpjekjet e fundit të sabotimit në Detin Baltik nuk janë incidente të izoluara; ato formojnë një model të qëllimshëm që synon të dëmtojë infrastrukturën tonë digjitale dhe energjetike”, shtoi Kallas.
Të shtunën, Ministrja e Jashtme gjermane Annalena Baerbock ngriti alarmin për “flotën hije” të Rusisë dhe bëri thirrje për sanksione të mëtejshme nga ana e BE-së.
Baerbock paralajmëroi se “flota hije” ruse përbënte një kërcënim serioz si për mjedisin ashtu edhe për sigurinë evropiane.
“Pothuajse çdo muaj, anijet aktualisht dëmtojnë kabllo të rëndësishme nënujore në Detin Baltik”, tha Baerbock.
Discussion about this post